Brigada sira halo distribuisaun materiál eleisaun segunda volta iha edifísiu nasionál STAE Caicoli, Dili, kuarta 13 abril 2022. Imajen Tatoli/Antonio Daciparu.

DILI, 18 abríl 2022 (TATOLI)—Sekretariadu Tékniku Adminitrasaun Eleitorál (STAE) munisípiu 12 inklui Rejiaun Administrativa Espesiál Oé-cusse Ambeno (RAEOA), segunda ne’e, hahú ona distribui materiál sensitivu no la’ós sensitivu eleisaun segunda volta nian ba sentru votasaun 1.200.

Notísia Relevante: STAE distribui ona materiál sensitivu ba munisípiu no diáspora

“Ohin, tuku 08h00, serimónia distribuisaun materiál eleisaun segunda volta ba sentru votasaun 1.200 no estasaun hamutuk 1.500 iha munisípiu 12 inklui Rejiaun Administrativa Espesiál Oé-cusse Ambeno (RAEOA) hahú ona no iha munisípiu sei kontinua hela. Ita halo ona distribuisaun materiál eleisaun nian iha loron 13 abríl 2022 ba iha munisípiu sira hotu, no ohin serimónia simultaneamente materiál hotu-hotu iha edifisíu STAE Munisípiu hodi distribui ba sentru votasaun sira iha territóriu nasionál,” Diretór Jerál STAE, Acilino Manuel Branco, hateten ba Agência TATOLI, iha nia knar fatin STAE Caicoli, Dili.

Iha distribuisaun materiál ne’e hetan seguransa másima hosi Polísia Nasionál Timor-Leste (PNTL) no Falintil-Forsa Defeza Timor-Leste (F- FDTL), hosi órgaun eleitorál ho observadór nasionál no internasionál, fiskál kandidatura sira-nian nune’e mós autoridade no entidade balun.

“Informasaun ne’ebé sira haruka mai ami katak sira hahú ona no balun to’o ona iha fatin nesesariamente suku sira ho kondisaun ne’ebé mak di’ak hotu. Sentru votasaun ne’ebé mak besik komesa transporta ona no sei akompaña hosi brigada, ofisiál monitorizadór hosi CNE nian konserteza hosi kada fiskál sira depois hetan seguransa hosi PNTL,” nia dehan.

Tuir nia, iha ohin kalan ne’e, materiál eleisaun hirak ne’e sei hela ho sira iha sentru votasaun to’o aban dadeer tuku 06h00 no sei entrega fali ba brigada no fiskál sira hodi hahú loke urna, nune’e halo preparasaun no aban (tersa, 19/04) sentru no estasaun votasaun hotu-hotu sei funsiona iha oras 07h00 dadeer to’o 15h00, atu nune’e ema hotu-hotu bele ezerse sira-nia direitu votu iha eleisaun prezidensiál segunda volta ne’e.

Kona-ba materiál eleisaun segunda volta nian iha diáspora, nia hateten momentu transporta iha 13 abríl 2022 ne’e hela kedas iha sentru votasaun balun no balun foin mak transporta ba sentru sira iha ne’ebá.

“Materiál eleisaun ne’ebé ita haruka ba diáspora ne’e hela kedas iha fatin ka sentru sira, ezetu fatin ne’ebé sai hosi ita-nia embaixada aluga, hanesan Dunganon mak foin transporta materiál ne’e,” ni esplika.

Diretór Jerál ne’e hateten, eleitor hamutuk 859.925 no diáspora hamutuk 7.113 ne’ebé kompostu hosi Australia 1.487, Korea do Sul 1.277, Inglatera 2.203, Irlandia do Norte 1.290

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here