Komandante Jerál Polisia Nasionál Timor-Leste (PNTL), Komisáriu Faustino da Costa, hala’o pasa revista ba formatura membru PNTL sira ne’ebé atu dezloka ba munisípiu sira asegura eleisaun Prezidensiál segunda volta. Imajen/Natalino Costa.

DILI, 17 abríl 2022 (TATOLI)— Komandante Jerál Polisia Nasionál Timor-Leste (PNTL), Komisáriu Faustino da Costa, hateten, nia parte rejeita informasaun ne’ebé espalla iha públiku liuliu rede sosiál katak ema balun lori kilat ilegál la’o iha territóriu nasionál.

“Publikasaun ne’ebé virál iha rede sosiál ne’e, Komandu PNTL mós akompaña, maibé imajen sira ne’ebé mak virál ne’e imajen antigu ne’ebé iha ema balun hakarak públika fila-fali hodi kria instabilidade iha tempu eleisaun nian. Nune’e husu ba públiku labele fiar informasaun ne’e,” Komisáriu Faustino da Costa hateten iha Kuartél Jerál PNTL-Caicoli, domingu ne’e.

Komisáriu PNTL ne’e dehan ne’e hahalok laiha resposabilidade hosi indivíduu balun ne’ebé hakarak aproveita situsaun hodi provoka malu. Nune’e Komandu Jerál PNTL husu atu públiku labele fiar informasaun falsu ne’e no kontinua kria pás no estabilidade atu festa demokrásia bele la’o di’ak.

Nune’e, Komandu PNTL orienta ona parte investigasaun kriminál atu buka tuir ema ne’ebé espalla informasaun falsu ne’e iha públiku atu halo identifiksaun iha oras 12 nia laran.

Atu fasilita investigasaun di’ak liu, Komandante PNTL ne’e husu ba Governu aselera Lei sibernétika atubele fó mós kompeténsia ba autoridade relevante hodi kriminaliza sidadaun ne’ebé hakarak lansa informasaun falsu iha rede sosial ho intesaun atu kria instabilidade rai-laran.

“Ita presiza iha lei sibernetika atu nune’e ita fasil buka tuir ema ne’ebé lansa imajen ka informasaun falsu sira iha média sosiál,” nia sujere.

Notísia relevante: PNTL preparadu asegura kampaña no eleisaun prezidensiál segunda volta

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here