Membru PNTL sira hala'o fomatura hodi selebrasaun aniversáriu Polisia Nasionál Timor-Leste – PNTL ba dala 22. Iha Sentru Formasaun PNTL, Comoro Dili, domingu (27/03). Imajen Tatoli/Francisco Sony

DILI, 28 marsu 2022 (TATOLI)— Polisia Nasionál Timor-Leste (PNTL), preparadu asegura kampaña no eleisaun prezidensiál segunda volta atu sidaudaun sira ezerse direitu vota ho livre no sekretu.

Komandante Jerál PNTL, Komisáriu Faustino da Costa. Imajen TATOLI/Egas Cristóvão

“Ha’u hanoin Polisia Nasionál Timor-Leste (PNTL) nafatin firme iha posizaun hodi fó apoiu seguransa ba atividade demokrátiku sira liuliu kampaña no eleisaun prezidensiál, kuandu ita hakat tan pasu tuir mai,” Komandante Jerál PNTL, Komisáriu Faustino da Costa, hateten bainhira hala’o reuniaun avaliasaun hamutuk ho munisípiu 12 inklui Rejiaun Administrativu Espesiál Oé-Cusse no Ambeno (RAEOA) iha Timor Plaza, segunda ne’e.

Notísia relavante: Komandante PNTL husu membru sai forte fó seguransa ba povu-nasaun

Komandu PNTL kontinua uza rekursu sira ne’ebé antes ne’e koloka ona atu asegura seguransa bainhira akontese eleisaun prezidensiál segunda volta.

Maske, Komandante Jerál dehan, kampaña no eleisaun prezidensiál ne’ebé liu ona membru sira iha tereñu hasoru difikuldade hanesan kondisaun estrada iha área rurál no rede ba komunikasaun liuhosi rádiu sira.

“Kuaze buat hotu la’o di’ak iha kampaña no eleisaun prezidensiál, maibé kondisaun estrada sai duni obstakulu ba transporte ba membru PNTL atu halo movimentu iha área rurál, nune’e mós radiu komunikasaun ne’ebé difkulta membru sira atu halo servisu ho di’ak liu iha área rurál,” Komisáriu Faustino akresenta.

PNTL kontinua nafatin utuliza transporte ka veíkulu ne’ebé suporta hosi Governu hamutuk 36 hodi asegura seguransa ba kampaña no eleisaun prezidensiál segunda volta.

Enkuantu, problema seluk ne’ebé membru PNTL hasoru maka fasilidade protesaun ba membru sira ne’ebé minimu tebes, bainhira iha situsaun krime ruma mosu atu uza halo atusaun, nune’e Komandu PNTL sei buka hodi rezolve kestaun ne’e.

Líder Másimu PNTL ne’e afirma iha difikuldade, maibé PNTL nu’udar instituisaun Estadu ne’ebé iha responsabilidade ba área seguransa kontinua nafatin firme hodi fó apoiu segurasa ba eventu demokrátiku ne’e.

“Ha’u hakarak kongratula ba kandidatu Prezidente na’in-16 no ekipa susesu sira inklui povu Timor-Leste ne’ebé koopera tebes ho instituiaun PNTL hodi kontribui no garante seguransa iha kampaña no eleisaun bele la’o di’ak,” Komandante Jerál PNTL kongratula.

Molok ne’e, PNTL dezloka membru hamutuk 4.000-resin atu asegura kampaña no eleisaun prezidensiál iha territóriu nasionál.

Notísia relevante: Aniversáriu ba da-XXII, PR enkoraja PNTL hasa’e prezensa iha komunidade lokál

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here