Imajen: www. franciscanos.org.br

DILI, 14 abríl 2022 (TATOLI)-Arsebispu Arkidiozese Dili, Dom Virgílio do Carmo da Silva, hateten mundu ohin loron difísil ba ema atu serbí malu, hanesan Jesus Kristu ne’ebé liuhosi nia jestu hodi fase nia eskolante sira-nia ain, bainhira han kalan hamutuk ho nia eskolante sira.

Arsebispu Arkidioseze Metropolitana Dili, Don Virgílio do Carmo da Silva. Imajen Tatoli/ Egas Cristovão.

“Loloos ne’e eskolante sira maka fase Jesus nia ain, maibé Jesus maka fase fali sira nia ain, jestu Jesus nia ne’e dala-barak halo ita konfuzaun no halo ita la kompriende, tanba Maromak oan  bele fase fali nia eskolante sira nia ain”, Bispu Virgílio do Carmo da Silva, liuhosi nia omilia bainhira selebra misa kinta-feira santa iha Igreja Katedrál Dili, ohin.

Tuir Dom Virgílio, Jesus nia atu ne’e refleta ba ita sarani sira katak moris ne’e atu hadomi no serbí. Tanba ne’e nia iha kalan han ikus ho nia eskolante sira nia hatudu jestu domin ne’ebé la halo diskriminasaun hodi fase hotu eskolante sira nia ain.

“La’ós fasíl mos ba ita atu husik ita nia-án ba ema seluk atu serbí. Dala-barak la fasíl ema seluk  mos atu halo di’ak mai ita. La’ós fasíl para ita atu serbí ema seluk no ema seluk atu serbí ita, dala-barak ita sente la soi atu simu buat ida ne’e”, nia afirma.

Nia dehan, iha mundu agora la fasíl ba ema atu halo karidade ka tulun malu  gratuita maibé dala-barak ho intensaun.

“Ita nia mundu ohin loron ne’e ita nia lójika maka  ha’u fó ne’e , ita bo’ot  atu fó fali saida ba ha’u”, dehan nia.

Maibé Jesus Kristu hosi nia jestu fase nia eskolante sira nia ain ne’e refleta, nuudar sarani tenke  hatudu domin liuhosi tulun malu no serbí malu, maibé dala barak difísil atu tau prátika ida ne’e iha ita nia moris.

Tanba  ne’e, Dom Virgílio husu ba sarani idak idak, presiza halo ezame konsénsia hodi bele haree ba ita idak nia-án hodi tuir Nai Jesus nia nia jestu haraik án, hadomi malu ,tulun malu no serbí malu.

“Ita presiza hamoris domin ne’ebé loloos, halo karidade  ho fuan, la’os ho intensaun no hatene serbí ita nia-án no ema seluk”, Dom Virgílio fó hanoin.

Selebrasaun Jesus Kristu fase eskolante 12 nia-ain ne’e akompaña hosi Amu selebrante sira seluk no hetan partisipasaun másima hosi sarani sira.

Notísia relevante: Arsebispu Dili Husu Líder Nasionál no Polítiku Sira Hamutuk

Jornalista : Natalino Costa

Editora      : Rita Almeida

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here