Arcebispo ba Arquidiocese Metropolitana Dili, Virgílio do Carmo da Silva, SDB. Imajen/António Gonçalves.

DILI, 01 outubru 2019 (TATOLI) – Arsebispu ba Arquidiocese Metropolitana Dili, Virgílio do Carmo da Silva, SDB, husu ba líder nasionál no polítiku sira atu hamutuk hodi dezenvolve Timor-Leste.

“Ita husu nafatin líder no partidu polítiku sira atu hamutuk hodi hadi’a kontradisaun idea ka fukun balun ne’ebé mosu hodi hadi’a no fó solusaun ba dezenvolvimentu nasaun ne’e”, Bispu Virgílio do Carmo ba jornalista sira iha Pasu Episkopál-Lesidere, ohin.

Bispu Dioseze Dili ne’e fó hanoin ba líder nasionál no polítiku sira liuliu ba membru Governu ne’ebé seidauk simu pose.

Aléinde ne’e, Amu Virgílio dehan respeita órgaun soberana sira liuliu Parlamentu Nasionál nia opiniaun no desizaun, maibé kansela Xefe Estadu nia viajen ne’ebé reprezenta nasaun no povu ba iha rai-li’ur ne’e hatudu imajen la saudavel ba mundu.

“Ami-nia observasaun jerál mak Xefe Estadu atu bá rai li’ur ne’e reprezenta Estadu no povu, ne’ebé oportunidade ida ne’e mai dala ida de’it, la’ós loron-loron ne’ebé ita kontinua la autoriza Xefe Estadu ba rai-li’ur ne’e fó mós mensajen ida ne’ebé ladún saudavel ba mundu”, afirma Bispu Virgílio.

Nune’e, líder Igreja Katólika ne’e husu nafatin ba na’i-ulun nasaun no polítiku sira atu buka ona solusaun ba problema ne’ebé mosu iha Governu.

“Ita nafatin husu ba na’i-ulun sira atu hamutuk buka ona solusaun ba fukun sira ne’ebé sei iha liuliu iha Governu nia laran atu nune’e lalika iha tan problema sira ne’ebé hatudu mensajen la saudavel ba mundu”, Arsebispu Virgílio sujere.

Amu Virgílio dehan loos duni ne’e liberdade deputadu sira-nia tuir konstituisaun, maibé kansela ka la autoriza Xefe Estadu ba rai-li’ur hodi reprezentante povu ne’e hatudu imajen ladi’ak ba mundu.

“Ita haree ladún iha apoiu ka unidade entre Governu, Prezidente Repúblika no Parlamentu Nasionál tanba kansela viajen ne’e la’ós primeira vez”, tenik Bispu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here