Produtu lokál iha Bidau Lecidere, kuarta (06/04). Imajen TATOLI/Francisco Sony

DILI, 13 abril 2022 (TATOLLI)—Programa Ai-han Mundiál Nasaun Unida (WFP, sigla inglés) liuhosi programa Bolu Halo Asaun hodi Fortifikasaun Ai-han iha Timor-Leste, halo avaliasaun ba impaktu sósiu ekonómiku hosi COVID-19 iha Timor-Leste (AISE2) 2021, ne’ebé hatudu uma-kain 41% mak afetadu inseguransa ai-han.

“Timor-Leste nu’udar nasaun kiik ida no reziliénte ba sistema ai-han konstatemente durante tinan-rua ona, ho pandemia COVID-19 iha tinan 2020, kalamidade iha loron 04 abril 2021 no ohin loron folin-mina inklui ai-han sa’e tanba krize global Ukránia no Rúsia. Tanba ne’e, bazeia ba avaliasaun indika katak uma-kain 41% mak afetadu inseguransa ai-han iha loron 30 nia-laran, hosi nível moderadu ba todan molok avaliasaun ne’e hala’o,” refere nota ne’ebé Agência TATOLI asesu, kuarta ne’e.

Notísia relevante: Populasaun TL 36% enfrenta inseguransa ai-han grave

Situasaun ne’e akontese tanba ezekutivu hamenus orsamentu ba ai-han inklui konsumu ai-fuan no modo-tahan, ne’ebé hanesan estratejia prátika komún ne’ebé fó todan ba nível má nutrisaun feto no labarik sira, durante ne’e  a’as liu ona iha rai-laran, inklui prevalénsia krekas no diversidade dieta entre feto sira hahú hosi tinan 15 to’o 49, hosi nível riku-soin diferente.

Peskiza ba ai-han no nutrisaun hala’o iha tinan 2020, haree ba variedade sistema ai-han ne’ebé afetadu tuituir malu indika katak taxa prevalénsia ba raes badak hosi labarik sira iha 47,1%.

“Ezemplu labarik ida hosi labarik na’in-rua ho raes badak no feto sira tinan 15 to’o 49 ne’ebé iha ligasaun entre estatutu sósiu ekonómiku no a’as tebes moos ba labarik sira ne’ebé krekas liu (LKL < 18.5) no menús iha taxa diversifikasaun dieta, hatudu ho krize oioin no rezultadu inseguransa ai-han sai nesesidade atu bolu Governu Timor-Leste no parseiru interesadu sira halo asaun urjentemente atu hatán ba nesesidade nutrisaun populasaun,” nota hosi WFP relata.

Iha tendénsia presu modo-tahan, mina no legumes, tomate, fehuk roupa, liis, variedade ai-han, a’as hosi tinan 2020-2022, ne’ebé mudansa presu ai-han ne’e tanba disturbansia korrente ai-han dezafia abilidade ba dieta, ho ida-ne’e estratejia ba fortifikasaun ai-han bázika sira, ne’ebé komún liu sei lori mikro-nutriente ba konsumu ai-han bázika sira no sei  fó liu vantajen hodi hatán ba situasaun atuál ne’ebé seidauk responde.

Fo’os sai hanesan ai-han dieta bázika majór ba ema timor-oan sira ho metade individuál konsumu grama 315 kada loron, iha poténsia a’as no di’ak liu hodi sai hanesan veíkulu ba fortifikasaun.

“Nune’e, Governu bele muda esforsu hodi hatán ba rekerimentu nutrisaun mak hanesan  fortifika ai-han liuhosi Programa Protesaun Sosiál, ne’ebé mak eziste hanesan Programa Merenda Eskolár hodi bele sai nutrisaun sensitivu hodi inklui provizaun fo’os fortifikadu, mina no masin fortifikadu.

Aleinde ne’e, ai-han nutritivu ba ai-han ne’ebé mak fahe hosi Governu, inkluzaun hosi produtu ai-han nutritivu hanesan alvu suplementáriu ai-han nutritivu liuliu hodi prienxe nesesidade hosi feto no labarik sira liuhosi programa fahe ai-han ho eskalaun bo’ot hanesan Cesta Bázika.

Ba kestaun ne’e, WFP sujere ba Sentru Lojístiku Nasional (CLN, sigla portugés) hola fo’os hodi fortifikadu, hodi troka ba fo’os baibain sira ne’ebé importa hosi nasaun seluk hanesan Vietname, nu’udár parte ida hosi ai-han rezerva. 

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here