Diálogu sub-nasionál kona-bá sistema ai-han iha TL, ne’ebé realiza iha salaun eis-Kodim, suku Ritabou, postu administrativu Maliana, munisípiu Bobonaro, tersa (17/08/21). Imajen Tatoli/Sérgio da Cruz.

BOBONARO, 17 agostu 2021 (TATOLI)—Tuir dadus hosi Organizasaun Mundiál Alimentár no Organizasaun Mundiál Saúde, hatudu katak, populasaun Timor-Leste (TL) 400.000 ka (36%) mak enfrenta inseguransa ai-han grave.

Koordenadór Gabinete Apoia Sosiedade Sivil (GASC sígla portugés), Filipe da Costa, hato’o asuntu ne’e, iha diálogu sub-nasionál kona-bá sistema ai-han iha TL, ne’ebé realiza iha salaun eis-Kodim, suku Ritabou, postu administrativu Maliana, munisípiu Bobonaro, tersa ne’e.

“Dadus hosi ONU hatudu liga ho ita nia dadus hosi parte saúde iha TL populasaun millaun 1,3 ne’e sei iha 36% ka besik 400.000 mak enfrenta inseguransa ai-han grave, maske ita nia rai ne’ebé bokur no buras, iha mina, kafé, riku-soin oioin, maibé ita-nia mal nutrisaun sei aas iha mundu,” nia esplika.

Inseguransa ai-han grave kontinua aas afeta makás ba mal nutrisaun tanba iha fatór rua ne’e iha korelasaun ne’ebé forte, nune’e TL rejista kazu labarik tinan lima mai karaik raes badak sei iha 47,1%.

Mal nutrsiasaun  ninia efeitu maka dezenvolvimentu fíziku no kakutak fraku, liga  ba produtividade ne’ebé kiik, instabilidade sosiál no ekonomia.

“Iha 2018 mós Banku Mundiál fó-sai dadus katak, TL kuaze 30% mak moris ki’ak rabat rai ka moris de’it ho rendimentu $1.90 kada loron,” nia sita.

Maski Governu esforsu investe osan, serbisu ho parseiru barak, ho péritu oioin ne’ebé hatudu dalan, maibé dadus hatudu katak, iha mundu tomak prevalénsia inseguransa ai-han iha Ázia 28%, Sudeste Aziátiku iha 19% no TL 36% kedan.

Kona-bá prevalénsia labarik tinan lima mai karaik ne’ebé raes badak iha mundu tomak 22%, Ázia 22% no sudeste Aziátiku 27% maibé iha TL iha 47,1%.

Ho realidade ne’e, tenke redús problema mal nutrisaun iha TL, presija serbisu makás no foku liu tan hadi’a mal nutrisaun, maibé dalan ida mak asegura sistema ai-han ne’ebé di’ak atu ema hotu-hotu bele asesu ai-han seguru no nutritivu.

Hosi setór saúde tenke tau prioridade ba, Inan fó susu hahú sedu, kontinua to’o tinan rua ka liu tan, fó hahán komplementár no promosaun hahán saudável, suplementu  mikrenutriente, jestaun entegrada ba mal nutrisaun aguda, asesu ba saneamentu no ijiéne meloradu no asesu ba kontrasepsi.

Agrikultura no Peskas presija tau prioridade ba diversifikasaun no intensifikasaun sustentável ba produsaun ai-han uma ka’in inklui animal kiik no hasa’e produsaun ba konsumu ikan.

Setór edukasaun, mantein labarik feto sira no mane iha eskola, hadi’ak programa merenda eskolár, nu’udár rede ba seguransa sosiál no programa edukasaun nutrisaun, fó edukasaun nutrisaun bazeia ba ai-han ba estudante, manorin no administradór.

Setór turizmu  komersiu no indástria, presija tau prioridade, reforsa lei fortifikasaun ai-han hare no masin, apela ba ambiente merkadu hahan ne’ebé sensível ba nutrisaun ho kódigu internasionál ba merkadu substitutu susu-been inan nian.

Setór solidariedade sosiál no inkluzaun, presija tau prioridade ba fortalese programa Bolsa da Mãe, fó apoiu sensível ba nutrisaun ba uma-ka’in kiak-sira ho inan fó susu no inan isin-rua no labarik sira ho idade fulan 0-59.

Hosi setór obras publika, presija tau prioridade liu ba, hasa’e asesu ba bee hemu ho seguru tuir polítika nasionál ho nia Dekretu lei 4/2020/ kona-bá abastesimentu bee ba konsumu públiku.

Igualdade no Inkluzaun presija tau prioridade ba Redus Violénsia bazeia ba jéneru no Garante atividade promosaun, nutrisaun ne’ebé sensível jéneru iha setór hotu-hotu.

Administrasaun estatál presija, apoia koordenasaun multisetorál iha nível  sub no nasionál sira no Garante reflesaun prioridade ODS2 CNAP-NFS iha orsamentu no atividades iha nível sub no nasionál.

Setor finansa presija tau prioridade ba, alokasaun orsamentu apropriadu ba atividade sira hodi alkansa prioridade ODS2 CNAP-NFS, no regularmente halibur, analiza no fahe dadus  kona-bá hasoru kada prioridade.

Hosi pontu hirak-ne’e, liña ministériu-sira ne’ebé sai hanesan membru KONSANTIL tau hanesan prioridade, Gabinete Apoia Sosiedade Sivíl garante bele redús númeru mal nutrisaun iha TL no bele atinje ODS 2030.

Jornalista: Sérgio da Cruz

Editór: Cipriano Colo

Notísia relevante:

HAKEREK NO HATÁN

Please enter your comment!
Please enter your name here