DILI, 13 abril 2022 (TATOLI)—Ministériu Edukasaun Juventude no Desportu (MEJD) sei hein prosesu re-verifikasaun profesór kontratadu 5.203 molok determina estatutu ba permanente.
“Ministériu sei hein prosesu re-verifikasaun, bainhira finaliza ona sei aselera prosesu iha tempu besik, tanba asuntu profesór kontratadu no voluntáriu sai preokupasaun boot tebes ba ministériu,” Ministériu Edukasaun Juventude no Desportu, Armindo Maia, hateten iha Palásiu Governu, kuarta ne’e.
Notísia relevante: Komisaun G rekomenda MEJD integra profesór kontratadu iha prosesu rekrutamentu foun
Aleinde ne’e, kestaun ne’e MEJD aprezenta ona ba Komisaun Funsaun Públika (KFP) no Konsellu Ministru hodi halo mudansa ba estatutu hosi kontratadu ba permanante liuhosi rekrutamentu foun.
“Daudaun profesór sira laiha problema ho saláriu, durante ne’e sira kontinua simu, maibé preokupasaun ida maka sira-nia estatutu presiza iha mudansa,” nia akresenta.
Daudaun ne’e, MEJD konsege verifika ona profesór hamutuk 2.699, maibé prosesu seidauk ramata tanba sei hasoru tempu kampaña no eleisaun, tanba ne’e ministériu sei suspende hela.
“Kuandu sira-nia prosesu ramata ona, ministériu iha ona planu atu muda sira-nia estatutu ba kontratadu, maibé sei liuhosi prosedimentu ida kuandu sira kompleta rekezitu maka ministériu bele halo kontratu ho sira,” Ministru tenik.
Jornalista : Tomé Amado
Editora : Julia Chatarina
