Prezidente Komisaun A PN, Joaquim dos Santos, Imajen Tatoli/António Gonçalves

DILI, 13 abríl 2022 (TATOLI)—Prezidente Komisaun A trata asuntu Justisa no Konstituisional, Joaquim dos Santos, informa Komisaun A submete ona relatáriu paresér projetu-lei númeru 35/V (4ª)-Lei Rádiu Difuzaun ba meza Prezidente Parlamentu Nasionál (PPN) hodi ajenda ba diskusaun jeneralidade.

Notísia Relevante: PN no entidade relevante hahú diskute projetu-lei Rádiu Difuzaun

“Projetu lei ne’e ami halo tiha ona audénsia públiku hodi rona entidade relevante hotu no halo ona relatóriu submete ona ba iha meza Prezidente Parlamentu Nasionál hein de’it ajenda fali atu aprova iha jeneralidade, hafoin ne’e halo fali kalendáriu ba diskusaun espesialidade,” Joaquim dos Santos hateten ba Agéncia Tatoli, kuarta ne’e.

Preambulu proposta lei Rádiu Difuzaun hanesan ordenamentu jurídiku Timor-Leste (TL) regula jestaun espectro rádiu difuzaun utiliza rádiu difuzaun iha TL.

Komunikasaun sosiál reprezenta meiu transmite informasaun kona-ba kultura, ideia, identidade no sira seluk, nune’e regulasaun ne’e fundamental ho forma transmite informasaun ho kualidade hanesan direitu fundamental sidadaun mediátiku livre, plural, independente no diversu.

Regulamentasaun mateira iha projeitu lei ne’e reune regra ba programasaun obrigatóriu meiu komunikasaun sosiál, oráriu emisaun programa no klarifikasaun funsaun Konsellu Imprensa iha ambitu funsaun fiskalizadór relativamente konteúdu ne’ebé emite ka prodús hosi órgaun komunikasaun sosiál.

Objetu lei regula exersísiu atividade komunikasaun sosiál radiofónika no televiziva iha territóriu nasionál.

Nune’e, Prezidente Komisaun A, esplika daudaun TL iha rádiu 20-resin no televizaun haat ka lima, nune’e hamosu lei ne’e ho nia konseitu ka substánsia mak atu evita servisu órgaun komunikasaun sosiál sira-ne’ebé seidauk rejistu maibé hala’o karik presiza regula, no garante órgaun komunikasaun informasaun bele iha kualidade, garante informasaun ne’ebé fó sai iha balansu ba parte hotu ne’ebé rona no fó informasaun.

“Ne’ebé, sei regula liu buat lubuk ida kona-ba regula direitu ba antena, programasaun saida mak informa, nune’e buat lubuk ida mak sei haree rádiu ho televizaun iha kategória públiku no privadu hodi regula direitu no dever,” nia hateten.

Nune’e mós iha lukrutivu no la’ós komersiál ne’ebé ita hamosu termu ida kona-ba rádiu dutrinál la’ós lukrutivu hanesan harii hosi igreja, partidu nian, rádiu universidade ne’ebé existe la buka osan só fó informasaun kona-ba povu nia moris no edukasaun sívika.

Maibé, dadaun rádiu dutrinal existe seidauk barak no antesipa tempu oin mai mosu barak harii ne’e, sei hamosu konfuzaun entaun prevee lei refere hodi regula.

Tanba ne’e, Nia dehan lei ne’e mai ho objetivu ida de’it garante estabilidade Estadu liu hosi informasaun ne’ebe iha kualidade.

Deputadu ne’e hateten, durante ne’e órgaun komunikasaun sosiál la’o hela no lei foun ne’e atu regula di’ak liután, nune’e prepara kondisaun balun bainhira mosu tan ka harii ho mós seidauk hetan direitu injustisa, direitu antena hodi regula sira bele hetan sira-nia direitu antena.

“Ne’ebé, iha lei ne’e sei rekomenda buat lubuk ida hodi define lei refere. Kestaun prinsipál ka fundamental no kestaun tékniku operasionál sei haruka ba Governu mak regula,” nia dehan.

Enkuantu iha projeitu lei ne’e iha artigu hamutuk 51 no hosi Kapítulu I ko’alia kona-ba Dispozisaun Jerál ho nia artigu hamutuk haat, Kapítulu II Asesu Atividade ho nia artigu ida, Kapítulu III Programasaun ho nia artigu 13, Kapítulu IV Direitu Antena ho nia artigu rua.

Kapítulu V Atividade Rádiu Difuzaun, Sesaun I Rádiu Difuzaun Públika ho artigu tolu, Sesaun II Rádiu Difuzaun Privadu ho nia artigu tolu, Sesaun III Rádiu Difuzaun Relijioza ho nia artigu lima, Sesaun IV Rádiu Difuzaun Komunitária ho nia artigu haat, Sesaun V Rádiu Difuzaun Asosiativa ho nia artigu haat.

Kapítulu V Entidade Supervizora Komunikasaun Sosiál ho nia artigu rua, Kapítulu VI Rejime Sansionatóriu ho nia artigu ida, Kapítulu VII Kontra Ordenasaun ho nia artigu haat, Kapítulu VIII Sansaun Asesoriais ho nia artigu haat no Títulu III Dispozisaun finál ho artigu ida.

Projetu-lei ne’e asina hosi proponente Deputadu David Dias Ximenes Mandati, António Verdiál de Sousa, Adriano do Nacimento, Joaquim dos Santos, Francisco de Vasconcelos, Antoninho Bianco, Duarte Nunes, Virginia Ana Belo no Aderito Hugo da Costa.

Entidade relevante ne’ebé komisaun A halo ona audiénsia hodi rona hanoin ba projeitu lei ne’e mak hanesan Ministéiru ba Asuntu Parlamentár no Komunikasaun Sosiál (MAPKOMS), Konsellu Imprensa, Radio Televizaun Timor-Leste Empreza Públika (RTTEL-EP), Agéncia Noticiosa de Timor-Leste-TATOLI Institutu Públiku ho parte sira seluk tán.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here