Deputadu Joaquim Dos Santos, Imajen Tatoli/Antonio Goncalves.

DILI, 25 marsu 2022 (TATOLI)—Parlamentu Nasionál liuhosi komisaun A trata asuntu Justisa no Konstituisionál ho entidade relevante sira hahú  hala’o audénsia hodi diskute projeitu-lei númeru 35/V (4a)-lei Rádiu Difuzaun.

Entidade ne’ebé komisaun hala’o ona audénsia mak Ministéiru ba Asuntu Parlamentár no Komisaun Sosiál (MAPKOMS), Rádio Televizaun Timor-Leste Empreza Públika (RTTL-EP), Agéncia TATOLI, I.P, ho sira seluk no sei kontinua ho entidade seluk hodi rona mós sira-nia hanoin  hafoin halo relatóriu paresér.

“Agora audénsia públiku jeneralidade hotu komisaun sei halo relatóriu bainhira Parlamentu Nasionál aprova ona mak sei kontinua ba espesialidade,” Prezidente Komisaun A, Joaquim dos Santos ‘Boraluli’, hateten ba Tatoli iha Parlamentu Nasionál, sexta ne’e.

Lejisladór ne’e esplika, daudaun Timor-Leste iha rádiu 20-resin no televizaun haat ka lima de’it, nune’e hamosu projeitu lei ne’e ho nia konseitu ka substánsia mak atu evita servisu órgaun komunikasaun sosiál sira-ne’ebé seidauk rejista maibé hala’o karik presiza regula, no garante órgaun informasaun bele iha kualidade, garante informasaun ne’ebé fó sai iha balansu ba parte hotu ne’ebé rona no fó informasaun.

“Sei regula liu buat lubuk ida kona-ba regula direitu ba antena, programasaun saida mak informa nune’e buat lubuk ida mak sei haree rádiu ho televizaun iha kategória públiku no privadu hodi regula direitu no devér,” nia hateten.

Nune’e mós iha lukrutivu no laos komersiál ne’ebé ita hamosu termu ida kona-ba rádiu dutrinál  la’ós lukrutivu hanesan igreja harii, partidu nian, rádiu universidade, ne’ebé existe la buka osan só fó informasaun kona-ba populasaun povu nia moris no edukasaun sívika.

Maibé daudaun rádiu dutrinal existe seidauk barak no antisipa tempu oin mai mosu barak harii hamosu konfuzaun entaun prevee ho lei refere hodi regula.

Nune’e, nia dehan, lei ne’e mai ho objetivu ida de’it mak garante estabilidade Estadu liuhosi informasaun ne’ebé iha kualidade.

Prezidente Komisaun A ne’e hateten, durante ne’e órgaun komunikasaun sosiál la’o hela no lei foun ne’e atu regula di’ak liután, nune’e prepara kondisaun balun bainhira mosu tan ka harii ho mós seidauk hetan direitu injustisa, direitu antena hodi regula sira bele hetan sira-nia direitu antena.

“Ne’ebé iha lei ne’e sei rekomenda buat lubuk ida hodi define lei refere, Kestaun prinsipál ka fundamental no kestaun tékniku operasionál sei haruka ba Governu mak regula,” nia fdehan.

Nia dehan, proposta lei ne’e iha artigu 30-resin, ne’ebé iha audénsia ho entidade relevante sira hotu ba konkorda ho prosesu atu aprova lei ne’e, ajuda misaun di’ak liután no presiza hadi’a aumenta buat balun ne’ebé sei haree diskusaun espesialidade.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here