Lansamentu programa kréditu iha edifísiu Fomento, segunda (21/09). Imajen Tatoli/Florêncio Miranda Ximenes

DILI, 21 setembru 2020 (TATOLI)-Governu liuhosi Ministériu Turizmu, Komérsiu no Indústria (MTKI) ho apoia hosi Programa Nasaun Unida ba Dezenvolvimentu (PNUD) lansa programa fasilidade garantia kréditu (soft-loan) ba empreza sosiál sira ho funan porsentu tolu.

“Ami halo konkordásia ho ajénsia PNUD atu lansa programa fasilidade garantia kréditu ne’e ba micro pequena (ki’ik) no média empreza sira, ho objetivu atu apoia joven sira, tanba empreza sira barak maka foin hahú no iha planu négosiu di’ak,” tenik Vise-Ministru Turizmu, Komérsiu no  Industria, Domingos Lopes Antunes, iha diskursu lansamentu programa fasilidade garantia kréditu ne’e iha  edífisiu Fomento, segunda ne’e.

Iha serémonia lansamentu ne’e, MTKI  mós asina akordu tékniku ho PNUD, Banku Nasionál Komérsiu Timor-Leste (BNCTL, sigla portugés) no Institutu Apoia Dezenvolvimentu Emprezariál (IADE) atu fasilita programa ne’e bele la’o ho susesu.

Vise-Ministru Turizmu, Komérsiu no Indústria, Domingos Lopes Antunes, hamutuk ho Reprezentante PNUD iha Timor-Leste, asina akordu kooperasaun ba implementasaun garantia kréditu, segunda (21/09). Imajen Tatoli/Florêncio Miranda Ximenes

Programa ne’e sei foku liu ba empreza sira ne’ebé hala’o negósiu iha área agrikultura, turizmu, pekuária, peska, indústria no komérsiu hodi kria mós kampu traballu iha Timor-Leste.

Iha konkordánsia entre parte sira ne’e atu fó porsentu tolu ba  micro pequena no média empreza sira, ho kritéria asesu kréditu ho karakterístika soft-loan, katak la’ós funan de’it mak ki’ik maibé iha mós períodu ba fulan-tolu to’o neen.

“Bainhira ita-nia maluk sira (empreza) halo kréditu la selu direitamente ba banku, maibé fó fulan tolu to’o neen hafoin selu bainhira iha rendimentu ho funan no osan inan nian,” Vise-Ministru akresenta.

MTKI no PNUD deside transfere ona fundu ka kapitál ba BNCTL (hanesan implementadór) hamutuk $480.000 atu fasilita programa ne’e.

“MTKI mak na’in sei hamutuk ho PNUD no BNCTL no IADE atu haree guia implementasaun ba programa fasilidade kréditu ba empreza sosiál atu labele kria problema bainhira ema asesu ho kritéria sira ne’ebé iha ona planu negósiu,” nia akresenta.

Kréditu faze dahuluk hahú $1.000 to’o $25.000

Vise-Ministru Domingos rekoñese fundu ne’e ki’ik ho funan ki’ik ne’ebé empreza barak mak sei la asesu bainhira aplikante barak.

“Ami hanoin orsamentu ba 2021, ami hakarak propoin atu Governu bele aumenta tan $480.000, atu nune’e empreza iha 12 munsípiu inklui Rejiaun Administrativu Espesiál Oé-cusse no Ambeno (RAEOA) bele asesu,” nia fó hanoin.

Ba faze dahuluk, empreza sira bele asesu kréditu hahú hosi $1.000 to’o $25.000.

“Tanba foin hahú maka Governu presiza akompaña lai ho empréstimu ki’ik no funan ki’ik, bainhira sira ultrapasa ona negósiu ho di’ak sira bele ba asesu fali kréditu komérsiu atu asesu ba $30.000 to’o $100.000,” nia dehan.

MTKI sei divulga programa ne’e ba munisípiu sira atu joven sira no empreza sira bele aplika fundu ne’e no hala’o planu negósiu ho di’ak.

Iha fatin hanesan, Deputy Resident Representative PNUD iha Timor-Leste, Munkhtuya Altangerel, kongratula Governu tanba ho esforsu atu apoia no fasilita empreza sosiál sira atu asesu ba kréditu tanba dezenvolvimentu ne’e importante atubele kria empregu no diversifikasaun ekonómika.

“PNUD kontente bele asina ona akordu tékniku ho MTKI  ba implementasaun no konsolidasaun sistema garantia kréditu ba empreza sosiál sira, no PNUD mós fornese daudaun ona formasaun no sei kontinua apoia ba ezekusaun sistema kréditu ne’e,” nia subliña.

Nune’e, nia espera ho parseria ne’e bele iha kriasaun empregu no diversifika ekonómika iha Timor-Leste.

“Ha’u husu ba MTKI no BNCTL atu asegura atualizasaun fundu ne’e no halo avaliasaun ho di’ak no implementasaun ho balansu ba empreza sosiál sira,” nia fó hanoin.

Lansamentu ne’e, partisipa hosi Diretór BNCTL, Diretór  Jerál SERVE, Diretór Jerál Trandeinvest, Diretór Jerál Indústria, Prezidente CCI-TL, Diretór IADE, setór privadu, inklui funsionáriu MTKI.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here