iklan

EKONOMIA, HEADLINE, MUNISÍPIU, VIQUEQUE

Grupu Welera sai vensedór dahuluk kompetisaun soru tais iha Viqueque

Grupu Welera sai vensedór dahuluk kompetisaun soru tais iha Viqueque

Grupu soru tais hasai imajen hamutuk hafoin hasoru kompetisaun soru tais ba feto foin-sa’e, iha suku Uma Kiik, segunda (11/04). Imajen TATOLI/Vitorino Lopes da Costa

VIQUEQUE, 11 abril 2022 (TATOLI)—Ministériu Turizmu Komériu no Indústrua (MTKI) realiza kompetisaun soru tais ba feto foin-sa’e sira hodi promove eransa kulturál, hahú iha loron 06 to’o 11 abril.

Kompetisaun ne’e hetan partisipasaun hosi grupu lima hanesan  Grupu Welera, Habura Kultura 1,  Haburas 2, Feto Forte no Brok We, ne’ebé vensedór dahuluk mak Grupu Welera ho valór 86,9, vensedór daruak Grupu Haburas Kultura ho valór 85,6, no datoluk Grupu Feto Forte ho valór 81,9.

Tuir Koordenadór Programa Dezenvolvimentu Tais hosi MTKI,  António da Costa, atividade ne’e nu’udar parte ida atu prezerva no promove tais.

“Ministériu haree tais kultura no indústria sei konserva hosi munisípiu ida-idak, nune’e parte ministériu sei promove tais hodi mutiplika ekonónia sai forsa ekonomia. Bainhira munisípiu hotu maka soru tais, entaun sei aumenta rendimentu ba komunidade,” Koodenadór programa hateten ba Agência TATOLI,  iha kompetisaun soru tais nível munisípiu Viqueque, iha suku Uma Kiik, postu administrativu Viqueque villa, segunda ne’e.

Vensedór dahuluk hetan osan hamutuk $200 ho sertifikadu inklui partisipa kompetisaun iha nasionál iha maiu 2022, vensedór daruak hetan osan $150 ho sertifikadu no datoluk hetan osan $100 ho sertifikadu.

Notísia relevante: 16 Dezembru, UNESCO sei anunsia “Tais” sai Patrimóniu Kulturál-Immateriál mundiál

Antes ne’e, tais Timor Leste rejista ona iha  United Nations Educational, Scientific and Cultural Organization (UNESCO), nune’e tinan 2022 to’o 2025 Governu sei halo prezervasaun no promove tais.

“Objetivu hosi inisiativa ne’e hodi tais la’o ba oin, ita presiza iha rezolusaun hosi Governu, hodi hateten funsionáriu, estudante no organizasaun sira tenki utiliza tais hanesan uniforme, atu tais ne’e bele folin. Entaun ita kria katak ema iha munisípiu bele soru tais no feto barak sei envolve,” nia tenik.

Hasa’e kualidade tais

Aleinde ne’e, parte ministériu iha hanoin atu hamosu fábrika transforma tais ba roupa, ne’ebé sei loke kampu serbisu ba ema hotu.

“Bazeia ba dadus, funsionáriu públiku iha Timór kuaze 60.000, bainhira sira suku roupa ba tinan rua ka tolu, grupu soru tais bele hetan oportunidade ba negósiu boot,” nia tenik.

Seluk mak prodús farda uniforme ba estudante sira tanba durante ne’e sosa farda eskola hosi Indonézia.

“MTKI esforu hamutuk ho liña ministeriál hodi envolve ajénsia Fundasaun Alola no Timor Aid hodi kapasita grupu soru tais ho kualidade no kr tais labele sai. Ami kapasita ona feto barak hasa’e kualidade tais,” nia realsa.

Nune’e, Koordenadór programa husu ba inan sira hosi munisípiu Viqueque atu hanorin oan feto sira apreende soru tais .

“Tais rejista ona iha UNESCO, tanba ne’e ita tenki hadomi tais no prezerva nafatin tais. Entaun ita tenke pasa matenek ba oan feto sira, atu tais ne’e la’o nafatin ba oin, foin sa’e tenki otimista apreende soru tais tanba tais ne’e la’ós uza ba kultura de’it,” nia hato’o.

Iha fatin hanesan, Administradór postu Viqueque villa,  Duarte Soares Brandão, hato’o mensajen ba grupu sira ne’ebé sai vensedór ba kompetisaun soru tais labele hanoin to’o iha ne’e de’it, maibé tenki fó hanoin ba oan sira tenke aprende soru tais.

“Ita-nia kultura labele lakon. Bainhira oan sira la aprende agora, maka ita-nia kultura sei lakon  tanba ita la hatene. Iha kompetisaun hanesan soru tais presiza envolve grupu barak tanba dadaun grupu lima de’it maka partisipa. Tanba ne’e, husu ba MTKI karik ba futuru realiza tan  kompetisaun tenki envolve grupu soru tais sira iha munisípiu Viqueque,” Koordenadór salienta.

Jornalista: Vitorino Lopes da Costa

Editora    : Julia Chatarina

iklan
iklan

Leave a Reply

iklan
error: Content is protected !!