Prezidente ANPM, Florentino Soares Ferreira. Imajen TATOLI/Francisco Sony

DILI, 08 abril 2022 (TATOLI)—Autoridade Nasionál Petróleu no Minerál (ANPM) rekomenda opsaun tolu ba Governu hodi kontrola folin kombustível sa’e iha merkadu nasionál.

Prezidente ANPM, Florentino Soares Ferreira, hateten, fulan-rua ona folin kombustível kontinua sa’e iha merkadu internasionál tanba impaktu hosi konflitu entre Rúsia no Ukránia, tanba Rúsia aleinde produtór ba kombustível, sai mós hanesan nasaun koñesidu daruak ne’ebé prodús ba gás naturál iha mundu.

“Solusaun imediata ne’ebé ita bele foti  mak Governu bele hatuun taxa ba kombustível, atu nune’e fornesedór sira la presiza hasa’e fali folin, nune’e labele halo todan fali komunidade ho públiku,” Prezidente ANPM hateten ba Agência TATOLI, iha Universidade Dili (UNDIL), sesta ne’e.

Notísia relevante: TANE Konsumidór husu MPM regula folin kombustível

Dalan seluk ne’ebé bele foti mak fó subsídiu, tanba iha Indonézia no nasaun seluk halo subsídiu maibé la’ós fó ba povu hotu, maibé seletivu ba hirak ne’ebé kontribui ba ekonomia doméstika nian.

“Hanesan transporte sira, ida-ne’e Governu bele hanoin hatúr subsídiu ida ba mikrolete, taxi, bus no meiu transporte ne’ebé povu utiliza, atu nune’e folin ba transporte nian labele hasa’e. Tanba ha’u haree Governu la fó autorizasaun hasa’e folin transporte públiku, maibé ida-ne’e fó impaktu rendimentu ba motorista, tanba folin kombustível sa’e, maibé rendimentu ne’ebé sira hetan la apár ho folin mina nian, to’o agora transporte barak mak paradu, ne’e impaktu ba estudante no ema sira ne’ebé halo viajen bá-mai uza transporte públiku,” nia tenik.

Dalan seluk ba médiu no logu prazu mak Timor Gás no Petróleu, Empreza Públika (Timor GAP, E.P) hanesan empreza estatál bele hamosu sistema refinaria modular ida, atu nune’e bele kobre nesesidade ba kombustível hahú 25 to’o 30% hosi nesesidade totál.

“Ha’u senti ida-ne’e bele ajuda ona ita-nia ekonomia, maski neneik ita tenke liberta ita-nia an hosi importasaun kombustível, se lae folin mina sa’e iha merkadu no ninia efeitu ne’e ita mós kona,” nia akresenta.

Notísia relevante: Timor GAP, E.P deside Metinaro sai terminál importasaun LNG

Prezidente ANPM konsidera mós Timor-Leste hanesan nasaun produtór ba mina maibé mina matak ne’ebé seidauk bele halo rasik halo filtrajen própria.

“Ita sei depedénsia maka’as hosi nasaun li’ur, ita la’ós nasaun ne’ebé bele halo rasik mina, to’o agora sei importa hosi nasaun Indonézia, Malázia no Singapura,” nia salienta.

ANPM la regula presu mina iha rai-laran tanba folin mina sa’e adapta ho presu merkadu mundiál, tanba ne’e presiza buka solusaun hamutuk hodi Governu bele foti desizaun.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

1 KOMENTÁRIU

  1. Tuir hau nia hare komfiltu nebe maka akontese iha ukraina nee komflitu temporaria ,tamba nee husu ba guvernu wainhira tetu opsaun nebe maka ANPM temi nee tetu ho didiak:opsaun subsidiu ba mina nee ladun fo vantagen ba ema kbiit laek sira no vantagen liu ba ema riku sira nebe maka iha kareta hodi lao pasiar tun sae no lakohi halo tos no natar iha sira nia hela fatin ,pior liu ba ema empresario sira nebe uja opurtunidade nee hodi hariku an no hanehan ema kiak sira,opsaun hatun taxa nee mos lafavoravel ba ema kbiit laek sira,tamba taxa nebe maka oras lao dadaun nee hanesan aksaun edukativo ida ba ita nia ema,liu liu ema riku sira nebe maka iha transporte nee ,karik hatun taxa maka rendementu taxa kombustivel sei tun no governo sei gastos osan mina rai nian sei hotu,no hamosu mos engarafamento ou kemacetan iha sidade laran.
    Hau nia hanoin taxa nebe maka oras nee lao dadaun husik nune nafatin maibe osan husi taxa kombustivel ne maka tengki uja ba subsidio temporario hanesan kria servisu sinku dolar hodi hamos aldeia sira duke sae kareta halai ba mai,subsidio ba fatin turismu komunitaria,subsidio equipamentus hanesan ensada,besi,katana ba ema agrikultor sira,fornesemento gratuita doutor animal ka aihoris sira iha aldeia aldeia tamba,agrikultor labele buras diak wain hira laiha asistente husi doutor rua nee.

HAKEREK NO HATÁN

Please enter your comment!
Please enter your name here