Timor GAP, E.P realiza enkontru ho parseiru sira hodi rona aprezentasaun kona-ba estudu viavilidade ba projetu terminál importasaun iha Metinaro, iha salaun enkontru Timor GAP, E.P. Timor-Plaza CBD 2, kinta (03/02). Imajen TATOLI/Francisco Sony

DILI, 03 fevereiru 2022 (TATOLI)–Timor Gás no Petróleu, Empreza Públika (Timor GAP, E.P), foin lalais ne’e asina kontratu ho empreza Wood Group Kenny Sdn, hanesan konsultór no enjeñeira hodi halo estudu viabilidade ba terminál importasaun Gás Naturál Likifeitu (LNG, sigla inglés) iha Timor-Leste.

Diretór Manajementu Negósiu Downstream Timor GAP, E.P, Francelino Boavida, hateten, hosi estudu ne’e iha rezultadu importante hanesan determina fatin importasaun LNG.

“Momentu ne’ebá ami aprezenta lokál tolu hanesan Metinaro, Hera no Betano, maibé hafoin halo screening tuir metodolojia no kritériu ne’ebé mak uza iha diskusaun, deside hili fatin iha Metinaro,” Francelino Boavida, informa ba jornalista sira iha eskritóriu Timor GAP, E.P, CBD 2Timor-Plaza, kinta ne’e.

Estudu ne’e hala’o ona durante fulan-neen, hahú abríl 2021 no ramata ona iha novembru 2021, ho kustu $721.000, nune’e ohin empreza Wood Group Kenny Sdn halo aprezentasaun rezultadu estudu ba ekipa hosi Timor GAP, E.P, Eletricidade de Timor-Leste, Empreza Públika (EDTL, E.P), Autoridade Nasionál Eletrisidade, no Autoridade Nasionál Petróleu no Minerál (ANPM).

Notísia relevante: Timor GAP-Wood Group asina akordu estudu viabilidade terminál importasaun LNG

Objetivu harii terminál importasaun LNG iha Timór atubele salva gastu sira, liliu akizisaun kombustível ne’ebé kada tinan Estadu gasta kuaze millaun $100.

“Fiar katak bainhira projetu ne’e realiza bele redús kustu kombustível no minimiza emisaun karbonu dioksida ba iha atmósfera, tanba ita hatene katak gás naturál ne’e hanesan produtu ne’ebé hanesan cleaner energy,” nia akresenta.

Razaun hili Metinaro tanba mai ho konseitu dezenvolvimentu, ne’ebé momentu ne’e determina konseitu kuaze 10-resin, maibé to’o ikus identifika konseitu tolu ne’ebé mak viável liu no konseitu ne’e kesi ró boot atu para iha laranhodi simu karga hosi LNG.

Konseitu seluk hanesan maibé fasilidade ró ne’ebé utiliza sei konverte filafali ho kapasidade boot, hafoin fornese ba planta, no ikus liu mak konseitu ida atu harii iha rai-maran.

“Ita sei iha faze ida ho konseitu tolu, hafoin presiza estudu etalladu liután atubele hatene entre konseitu sira ne’e, ne’ebé mak di’ak liu,” nia tenik.

Hafoin konklui estudu viablidade, iha asuntu lubuk ida ne’ebé presiza diskute ho EDTL, E.P no ANPM atubele iha intendimentu di’ak molok halo estudu kle’an liu tanba iha aspeitu sira hanesan, aleinde projetu atu harii fasilidade, presiza haree konversaun hosi mákina sira ne’ebé mak EDTL, E.P utiliza iha planta.

Nune’e, EDTL, E.P sei halo estudu ida atu halo konversaun mákina uza gazoél ba gás naturál.

Iha biban hanesan, Ministru Petróleu no Minerál, Víctor da Conceição Soares, dehan, desde tinan 2020, Ministériu Petróleu no Minerál (MPM) iha ona kompromisu ba prioridade iha tempu naruk hodi asegura seguransa enerjétika nasionál, ne’ebé kompoen planu atu estabelese instalasaun armazenamentu kombustível atu garante fornesimentu kombustível, ne’ebé konfiável no realiza estudu nesesáriu atu inisia tranzisaun utiliza gás naturál ne’ebé estabelese ona.

“Dezenvolvimentu terminál importasaun iha fatin ne’ebé rekomenda ona hosi estudu ne’e sei permite hodi fasilita prosesu entrega, rai no regasifikasaun LNG ho forma efikásia, ekonómika no segura,” Governante ne’e renik.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here