Sekretáriu Estadu Terras no Propriedade, Mário Ximenes. Imajen TATOLI/Egas Cristovão

DILI, 19 janeiru 2021 (TATOLI)—Iha tinan 2019 to’o 2020, Sekretaria Estadu Terra no Priopriedade (SETP) rekolla reseita hamutuk millaun $4,2, enkuantu iha tinan 2017 to’o 2018 rekolla millaun $2-resin.

Sekretáriu Estadu Terra no Propriedade, Mário Ximenes, relata rendimentu sira ne’e SETP rekolla hosi arrendamentu rai Estadu hosi instituisaun privadu no pesoál privadu, ne’ebé mak utiliza rai Estadu no halo kontratu ho Estadu.

Relasiona ho progresu serbisu ne’ebé atinje ona durante ne’e, governante ne’e informa ba Primeiru-Ministru,Taur Matan Ruak, hodi simu nafatin orientasaun no nafatin husu apoiu atu bele hala’o serbisu ho di’ak.

“Primeiru-Ministru bolu ha’u tanba hakarak hatene oituan kona-ba ami-nia serbisu loron-loron. Ami-nia serbisu mak haree liu ba priopriedade Estadu, ne’ebé hanesan membru Governu ida, hetan orientasaun polítika hosi superiór hodi haree ba polítika VIII Governu hakarak atinje objetivu rendimentu sustentável no mós absolve traballadór sira,” Sekretáriu Estadu Mário Ximenes, relata ba jornalista sira hafoin ramata reuniaun ho Xefe Ezekutivu, iha Palásiu Governu, tersa ne’e.

Membru ezekutivu ne’e dehan, maski iha tinan 2019 to’o 2020 Governu hasoru situasaun difísil hanesan situasaun polítika la estável no moras COVID-19, maibé SETP nafatin iha rendimentu.

Tuir dadus hosi SETP ne’ebé publika antes ne’e, sidadaun ne’ebé okupa patrimoniu Estadu hanesan edifísiu no rai Estadu hodi halo negósiu hamutuk 1114, ne’ebé ninia presu selu sei haree ba klasifiksaun no poténsia rai, uza hela ka halo negósiu, nia presu sei la hanesan.

Aleinde ne’e, rejista 8340 arrendatáriu iha territóriu ne’ebé mak halo kontratu utiliza patrimóniu Estadu no selu kada fulan.

Enkuantu, arrendatáriu hamutuk 4115 maka selu ativu, maibé 4225 mak la kumpre selu areendamentu desde 2017 to’o 2020.

Tuir Lei númeru 1/2003  no dekretu lei nú19/2004  ne’ebé ko’alia kona-ba propriedade Estadu no kobra arrendamentu, daudaun presu areendamentu ne’ebé aplika la korresponde ona presu rai iha merkadu ohin loron.

Tanba ne’e, Governu liuhosi Ministériu Justisa iha tempu besik sei implementa tabela foun arrendamentu rai no uma Estadu ba públiku.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here