Logo UNTL.

DILI, 15 setembru 2020 (TATOLI)-Dekana Fakuldade Edukasaun Arte no Humaniora (FEAH) Universidade Nasionál Timor Lorosa’e (UNTL), Ana Cristina de Jesus Silveira Martins, informa daudau ne’e nia parte kontinua prepara kondisaun liliu investe iha rekursu umanu no fasilidade nune’e bele hetan ona akreditasaun husi Ajénsia Nasionál ba Avaliasaun Akreditasaun Akadémika (ANAAA).

Iha tinan 2018 liubá, ANAAA halo ona avaliasaun ba Fakuldade UNTL ne’e maibé la konsege fó akreditasaun tanba seidauk prienxe padraun 10 ne’ebé sira estabelese ba Instituisaun Ensinu Superiór Públiku no Privado (IESPP).

Notísia Relevante :ANAAA avalia ona kursu 105, ida taka

Padraun 10  no indikadór 108 maka ANAAA uza hodi halo avaliasaun ba universidade sira, padraun sira ne’e maka vizaun, misaun, metas no objetivu husi kursu ne’e rasik atu nuné bele aliña ninia papel  tuir vizaun no misaun Instituisaun nian no seluk tan.

“Ami nia atividade edukasaun fizika desportu la’o hela hanesan baibain, ami mós kontinua selebra hela graduasaun ba estudante sira,  maibé ami la simu de’it mak estudante foun,” dehan nia ba Tatoli iha ninia servisu fatin Liceu Caicoli, tersa ne’e.

Nia esplika Fakuldade ne’e, daudaun ne’e akumula estudante hamutuk ema na’in 415 ho nivel grau baxarelatu.

Tuir nia atu prienxe rekezitu hodi hetan akreditasaun husi ANAAA maka oras ne’e haruka ona dosente na’in rua bá estuda iha Portugal ho nivel mestradu (S3) iha área desportu.

Entertantu, Diretór Ezekutivu ANAAA, Edmundo Viegas, dehan kursu sira ne’ebé maka seidauk hetan akreditasaun husi ANAAA labele simu estudante foun no halo graduasaun ba estudante finalista sira, hodi hein prosesu re-avaliasaun tuirmai hodi hetan akreditasaun.

“Sira labele simu estudante foun no labele selebra graduasaun,” dehan nia ba Tatoli, tersa ne’e.

Fakuldade ne’e la konsege hetan akreditasaun husi ANAAA tanba fallansu tékniku ne’ebé mosu entre FEAH no Sekretáriu Estadu Juventude no Desportu (SEJD).

“Kursu desportu ne’e inisitaiva SEJD nian, sira haruka loke tiha maibé ikusmai kooperasaun entre Governu no UNTL lakon tiha de’it entaun afeta ba atividade sira,” dehan nia.

Iha akordu ne’e parte rua konkorda hodi fahe responsabilidade ba malu, husi UNTL toma konta ba fasilidade, sala aprendizajen, enkuantu SEJD maka responsabiliza kadeira, meza, ekipamentu prátika desportu no profesór sira.

Akordu ne’e parte rua la konsege implementa tanba mudansa Governasaun ne’ebé afeta mós ba estrutura Governu.

Maibé iha fulan-agostu 2020 liubá, UNTL no SEJD asina fali ona nota kooperasaun foun hodi implementa iha futuru.
Notísia Relevante :IESPP haat hetan valór aas husi ANAAA

Jornalista : Tomé Amado

Editór       : Agapito dos Santos

HAKEREK NO HATÁN

Please enter your comment!
Please enter your name here