Suku Camanasa seidauk simu materiál eletróniku hosi Governu
COVALIMA, 06 abríl 2022 (TATOLI)–Xefe suku Camanasa, Samuel Mendonça informa, suku Camanasa seidauk simu materiál eletróniku hosi Governu liuhosi Ministériu Administrasaun Estatál (MAE) hodi fasilita xefe suku nia servisu loro-loron nian.
Notísia Relevante: MAE distribui materiál eletrónika ba xefe suku sira iha Dili
“Ami seidauk simu ekipamentu eleróniku. Daudaun ne’e ami buka meiu rasik hodi uza laptop no makina emprime ida. Parte Governu sira atu distribui materiál eletróniku maibé to’o agora ami seidauk simu,” Xefe Suku Camanasa, Samuel Mendonça informa ba Agência Tatoli, iha sede suku Camanasa, Covalima, kuarta ne’e.
Nia informa, maske Governu liuhosi Ministériu Administrasaun Estatál (MAE) distribui ona materiál eletróniku ba xefe suku sira iha munisípiu Dili, maibé suku sira iha munisípiu Covalima seidauk simu maibé karik iha tempu badak nia laran sei simu hotu.
“Ami mós rona Governu hahú distribui ona materiál eletróniku iha munisípiu Dili maibé iha Covalima to’o ohin loron ami seidauk rona informasaun xefe suku sira atu simu materiál eletróniku ba xefw suku sira tanba ne’e ami hein de’it,” nia dehan.
Durante ne’e xefe suku sira hato’o ona sira-nia preokupasaun ba Governu hodi fasilita sira-nia servisu iha sede suku hodi halo atendementu ba komunidade iha suku, maibé to’o ohin loron seidauk iha rezultadu.
“Maske ho ekipamentu ne’ebé ita haree la sufisiente ami esforsu, ami atende komuniade ho di’ak. Agora ami uza laptop ne’ebé ami buka rasik no ami rona iha fatin balun simu daudaun ona, ami garante ba oin sei mai,” nia hateten.
Iha sorin seluk, Xefe suku Matai João Gusmão reforsa, xefe suku sira iha Covalima seidauk iha informasaun atu simu materiál eletróniku hosi Governu.
Durante iha nia mandatu seidauk simu materiál eletróniku no nia rasik uza nia kapasidade hodi hetan apoiu hosi instituisaun balun hodi halo atendimentu ba komunidade iha sede suku.
Antes ne’e, iha loron 30 fulan-marsu tinan ne’e Ministériu Administrasaun Estatál (MAE) distribui ona materiál eletróniku hanesan komputadór no makina emprime ho CPU ba xefe suku sira iha munisípiu dili, bazea ba lei númeru 9/2016 materiál eletróniku, importante ba xefe suku sira.
Jornalista : Celestina Teles
Editór : Cancio Ximenes
