Ministu Administrasaun Estatál (MAE), Miguel Pereira de CVaevalho, entrega materiál eletrónika ba xefe suku sira iha munisípiu Dili. Imajen Tatoli/Osória Marques.

DILI, 30 marsu 2022 (TATOLI)—Ministériu Administrasaun Estatál (MAE) liuhosi Autoridade Munisípiu Dili (AMD), kuarta ne’e, distribui materiál eletrónika ba xefe suku sira iha munisípiu Dili.

Notísia Relevante: MAE atribui materiál eletróniku ba suku hotu

“Ohin ha’u mai iha Autoridade Munisípiu Dili entrega simbolikamente komputadór, mákina emprime ho CPU ba suku hotu-hotu iha munisípiu Dili nian,” Ministériu Administrasaun Estatál (MAE), Miguel Pereira de Carvalho, hateten ba jornalista sira, iha resintu Autoridade Munisípiu Dili.

Xefe suku sira iha Munisípiu Dili hein hela atu simu materiál eletrónika hosi MAE no Autoridade Munisípiu Dili. Imajen Tatoli/Osória Marques.

Nia dehan, materiál eletrónika importante tebes ba suku sira hodi apoiu sira ba hala’o atribuisaun ne’ebé hatuur iha lei númeru 9/2016, tanba suku sira mak sai ponte hodi liga ho administrasaun lokál Estadu nian ne’ebé atu hala’o prestasaun servisu hodi servi Estadu no ba povu ida-ne’e.

Ida-ne’e, tuir nia, hanesan programa hosi VIII Governu Konstitusionál nian ba tinan ne’e no ohin MAE disponibiliza entrega materiál eletrónika tanba MAE kompromitidu ona atu distribui antes mandatu ramata iha tinan 2023.

“Faktu ne’ebé ita iha mak sede suku iha Timor-Leste ne’e, ita rehabilita hotu ona sede suku 400 no hela sede suku 52 mak seidauk, no hein tinan ne’e no tinan oin bele finaliza ona,” nia dehan.

Ho fasilidade ne’ebé Governu liuhosi MAE entrega ona ba xefe suku sira-ne’e, nia hateten, sei fasilita servisu xefe suku sira-nian nune’e bele atende ba povu nia nesesidade.

“Ohin simbolikamente de’it maibé iha fulan ne’e no fulan oin, ita sei distribui hotu ba munisípiu hotu-hotu iha Timor-Leste,” nia dehan.

Nia informa, orsamentu ne’ebé MAE prevee ho sosa materiál eletrónika hirak ne’e kuaze rihun $900.

Aleinde ne’e, governante ne’e hateten, MAE mós entrega ona karreta 10 ba Autoridade Munisípiu Dili (AMD) hodi bele hala’o servisu ho di’ak liután.

Xefe Suku Dare, Gil de Araújo, hateten ho fasilidade hirak-ne’e bele fasilita sira hodi hala’o sira-nia servisu iha suku no bele atende komunidade nia nesesidade.

“Maromak tulun, MAE liuhosi AMD bele fó apoiu materiál eletrónika ba kada suku, no importante duni atu hetan hodi bele hala’o servisu iha suku laran,” nia dehan.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here