Ministru Obra Públika, Abel Pires da Silva. Imajen Tatoli/Francisco Sony

DILI, 06 abril 2022 (TATOLI)—Konsellu Administrasaun Fundu Infraestrutura (KAFI) foti ona desizaun finál ba projetu emerjénsia reabilitasaun estrada Tasi-tolu, Dili, ne’ebé sei ezekuta hosi kompañia Jonize, Unipessoal Lda, semana ne’e nia-laran.

“Iha loron 02 abril, KAFI deside ajudika direita ba kompañia Jonize mak sai manán-na’in no semana ne’e nia-laran sei halo obra iha Tasi-Tolu,” Ministru Obra Públika, Abel Pires da Silva, hateten ba Agência TATOLI, iha Palásiu Governu, kuarta ne’e.

Notísia relevante: MOP sei loke konkursu hadi’a estrada ligasaun Tasi-tolu to’o rotunda Comoro

Obra ne’e bazeia ba pedidu projetu emerjénsia Road Upgrading Project, Dili (Raikotu)Tasi-Tolu (Road link A 03-01), Stasaun 8+000 – Stasaun 8+743.246,  ne’ebé Ministériu Obra Públika (MOP) aprezenta iha loron 31 marsu liubá iha KAFI.

Antes ne’e, MOP rekomenda empreza neen ba KAFI, nune’e deside mak Jonize, Unipessoal Lda tanba hanesan empreza kualifikadu no iha rekursu finanseiru di’ak ho ekipamentu pezadu  apropriadu. 

“KAFI foti desizaun deside kompañia Jonize responsabiliza projetu emerjénsia ne’e tanba ho objetivu hodi responde lalais ba situasaun rezolve inundasaun ne’ebé sempre akontese bainhira udan tau no prepara ba selebrasaun 20 maiu 2022, no iha tempu hanesan mós sei realiza pose ba Prezidente Repúblika períodu tinan 2022-2027,” nia dehan.

Nune’e, Governu liuhosi MOP hanesan  na’in ba projetu, bolu ona kompañia selesionadu, hodi halo ona diskusaun no tuun direita hodi haree fatin projetu emerjénsia estrada iha Tasi-tolu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here