Vise-Ministru Obra Públika, Nicolau Lino Freitas Belo. Imajen TATOLI/Francisco Sony

DILI, 28 marsu 2022 (TATOLI)—Vise-Ministru Obra Púbika, Nicolau Lino Freitas Belo, hateten, iha tempu badak ministériu sei loke konkursu urjentemente atu hadi’a estrada Tasi-tolu liga ba rotunda Nicolau Lobato, Comoro.

“Ita sei esforsu semana rua nia-laran hodi rezolve estrada Tasi-tolu, presiza halo konkursu tanba haree ba desizaun Ministru nian katak semana ida-ne’e levantamentu dadus no estudu mós loos ona. Ita sei halo restritu konkursu bolu empreza nasionál sira dezvia lalais tiha bee, hodi nune’e labele afeta ba saúde públika ba komunidade iha Tasi-tolu,” Vise-Ministru hateten iha salaun MOP, Caicoli, segunda ne’e.

Notísia relevante: MOP notifika abitante afetadu ‘hamamuk’ fatin Tasi-Tolu to’o rotunda Comoro

iha fatin hanesan, Prezidente Institutu Jestaun Ekipamentu, Institutu Públiku (IGE, I.P, sigla portugés), Ermenegilda da Costa  Laurentina, hateten, molok tama loron 20 maiu 2022 hanesan loron Restaurasaun Independénsia, estrada ne’e tenke di’ak ona.

Tanba ne’e ohin Prezidente IGE, I.P hamutuk ho Ministru Obra Públika Abel Pires, Vise-Ministru Obra Púbika Nicolau Lino Freitas Belo, Vise-Ministériu Finansa António Freitas, ko’alia kona-ba estrada ne’e.

“Presiza duni apoiu emerjénsia, entaun ohin iha ona opsaun balun katak atu uza osan infraestrutura atu loke konkursu emerjénsia, nune’e molok loron 20 maiu 2022 ita bele uza ona estrada ne’e,” nia dehan.

Hafoin halo diskusaun, deside parte MOP liuhosi Diresaun Nasionál Estrada, Ponte no kontrolu Cheia mak sei responsável ba programa no hosi IGE, I.P nian téknikamente mantein apoiu iha terrenu.

Estrada Tasi-tolu to’o Rotunda Comoro ne’e kuaze kilómetru rua hamutuk ho pakote estrada trosu Tibár to’o Tasi-Tolu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here