SEFOPE hala'o enkontru no asina akordu ho família no traballadór sira ne'ebé atu ba serbisu iha Koreia Súl, iha salaun Otél Timor Lodge, Comoro, tersa (05/04). Imajen TATOLI/Francisco Sony

DILI, 05 abril 2022 (TATOLI)—Governu liuhosi Ministériu Koordenadór Asuntu Ekonómiku (MKAE), Sekretaria Estadu Formasaun Profisionál no Empregu (SEFOPE), Reprezentante Komisaun E ne’ebé trata asuntu Ekonómia no Dezenvolvimentu, halo despedida no asina akordu ho família no traballadór timor-oan hamutuk na’in-59 atu bá serbisu iha Koreia Súl.

Iha seremónia ne’e, Ministru Koordenadór Asuntu Ekonómiku, Joaquim Amaral, enkoraja traballadór ne’ebé atu ba serbisu iha kinta (07/04) ne’e ho responsabilidade.

“Asinatura deklarasaun ohin, ita asume responsabilidade hamutuk, nune’e bainhira ita-boot sira ba serbisu iha rai-li’ur ho seguru no responsabilidade, tanba ba oin povu rua ne’e nia relasaun sei metin liuhosi ita-boot sira-nia prezensa. Tanba ne’e tenke hatudu nafatin komportamentu di’ak hodi hametin relasaun povu Timor-Leste no Korea Súl,” Ministru hateten iha Otél Timor Lodge, Comoro, tersa ne’e.

Notísia relevante: Kandidatu traballadór timor-oan 136 ba Koreia Súl tuir formasaun preleminária

Nune’e, lori Governu Timor-Leste nia-naran, Ministru hato’o agradesimentu ba Governu Koreia Súl ne’ebé fó oportunidade ba timor-oan hodi bá serbisu iha Koreia Súl.

“Agradese tanba Governu Korea Súl bele loke liman ba Timor-Leste hodi bá serbisu iha Koreia Súl, nune’e husu ba trablladór sira hodi aproveita didi’ak nune’e filafali mai bele aplika iha ita-nia nasaun,” nia akresenta.

Iha biban hanesan, Sekretáriu Estadu Formasaun Profisionál no Empregu, Alarico de Rosário, husu traballadór sira hodi kumpre kompromisu hanesan serbisu labele sees-an hosi sistema, nune’e empregadór sira bele emprega tan joven sira ne’ebé hein hela oportunidade serbisu.

“Aktu ohin hanesan ona tradisaun ida ba ita, bainhira traballadór ida atu ba serbisu iha Koreia Súl ka Austrália, ita tenke asina deklarasaun, signifika parte Governu no família sira prontu husik sira-nia oan bá serbisu iha Austrália, nune’e bainhira iha buat ruma akontese, parte rua prontu hamutuk buka dalan hodi rezolve,” nia dehan.

Nune’e mós, Prezidente Komisaun E ne’ebé trata Asuntu Ekonómia no Dezenvolvimentu,  Antonino Bianco, konsidera susesu ne’ebé traballadór sira hetan la’ós tanba Governu, maibé tanba esforsu-an hodi hetan oportunidade.

“Ita-boot nia responsabilidade mak morál no orasaun sira, tanba ne’e tenke bá serbisu ho kuidadu-an iha ema-nia rai,” nia dehan.

Embaixadór Koreia Súl ba Timor-Leste, Kim Jeong Ho, husu traballadór labele ses hosi sistema, nune’e nafatin hetan kontrolu hosi adidu.

“Ha’u husu ba imi, bainhira hetan osan karik rai ho kuidadu hodi sustenta família, tanba iha Koreia Súl nasaun ne’ebé avansadu, tanba ne’e tenke kuidadu-an no ba labele hatene de’it buka osan maibé aproveita oportunidade aprende abilidade ruma, nune’e filafali mai aplika iha Timor-Leste hodi dezenvolve Timor-Leste,” nia apela.

Iha fatin hanesan, Traballadór Arlindo Alves dos Santos, nia parte sente kontente tanba bele hetan oportunidade bá serbisu iha Koreia Súl hodi hadi’a ekonomia família.

“Bainhira to’o ne’ebá, ha’u sei kumpre deklasaun ne’ebé ohin ha’u asina ona, liuliu oinsá labele sees hosi sistema durante ha’u-nia kontratu tinan-tolu fulan-neen,” nia dehan.

Traballadór na’in-59 ne’ebé asina deklarasaun ho Governu ne’e, kompostu hosi mane hotu, ne’ebé sei serbisu iha área peska 26 no fábrika 27, no re-entry neen.

Tuir dadus traballadór hosi janeiru to’o abril ne’ebé serbisu iha Korea Súl hamutuk 256.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here