SEFOPE realiza formasaun prelimináriu ba kandidatu traballadór timor-oan atu ba serbisu iha Koreia Súl, iha salaun Sentru Formasaun Senai, Becora, segunda (28/03). Imajen TATOLI/Francisco Sony

DILI, 28 marsu 2022 (TATOLI)-Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), ne’ebé serbisu hamutuk ho Dezenvolvimentu Rekursu Umanu Koreia, segunda ne’e, realiza formasaun preliminária ba kandidatu traballadór timor-oan hamutuk na’in-136 atu bá serbisu iha Koreia Súl.

Diretór Nasionál Empregu Exteriór SEFOPE, Filomeno Soares. Imajen TATOLI/Francisco Sony

Diretór Nasionál Empregu Exteriór, Filomeno Soares, hateten, objetivu atividade ne’e atu hanorin kandidatu traballadór sira kona-ba kultura, disiplina no ambiente serbisu iha Koreia Súl, nune’e sira bele hatene ambiente molok tama serbisu.

“Liuhosi formasaun preliminária ne’e, ha’u husu ba kandidatu traballadór 136, ne’ebé hetan ona oportunidade ne’e, atu hadook-an hosi ransu livre no kuidadu saúde, tanba atu ba serbisu mak deteta moras no halo krime sei kansela,” Diretór ne’e apela ba kandidatu traballadór sira, iha salaun Sentru Formasaun Senai, Becora.

Notísia relevante: Traballadór 94 arranka bá Koreia Súl no rua kansela viajen

Biban ne’e, Diretór ne’e husu ba kandidatu traballadór sira atu aproveita didi’ak formasaun durante loron-sia ne’e hodi apreende, nune’e bele iha oportunidade ba serbisu iha rai-li’ur.

Tuir dadus SEFOPE, traballadór ne’ebé serbisu iha Koreia Súl hahú hosi tinan 2009 to’o novembru 2021 hamutuk 3.819, kompostu hosi mane 3.684 no feto 135.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here