Kandidatu Prezidente Republika períodu 2022-2027, Francisco Guterres Lú Olo, halo kampana ho tipu diálogu iha salaun Parokiál Same Vila, segunda (04/04). Imajen Tatoli/Anito Santos.

MANUFAHI, 04 abríl 2022 (TATOLI)—Kandidatu Prezidente Repúblika, períodu 2022-2027, ho númeru sorteiu 2, Francisco Guterres Lú Olo, promete bainhira re-eleitu sai Prezidente Repúblika sei propoin ba Governu atu dezenvolve setór agrikultura no peska iha munisípiu Manufahi.

Notísia Relevante: Reeleitu sai PR: Lú Olo sei hametin Estadu hodi kumpre konstituisaun RDTL

“Prezidente Repúblika iha relasaun instituisional ho ezekutivu no iha influensia majistradu maibé la interven knar ezekutivu no bele propoin no hato’o mensajen krítiku ba Governu liuhosi Primeiru-Ministru hodi implementa programa oinsá halo agrikultura aumenta produsaun no peska ne’ebé iha Betano-Same ne’e potensiál tebes,” Lú Olo promete bainhira hala’o kampaña ho tipu diálogu ho militante no apoiante sira iha salaun parokiál Same Vila, munisípiu Manufahi, segunda ne’e.

Tir nia, Xefe Estadu mós sei atentu ho Governu liuhosi primeiru oinsá implementa programa edukasaun, saúde no aspeitu seluk ho kualidade dezenvolvimentu sustentavel ba povu, no sei pronunsia ba Parlamentu Nasionál bainhira atu promulga lei sira.

“Parlamentu Nasionál hanesan órgaun fiskalizadór no lejisladór bainhira aprova ona lei ruma mak sei haruka ba Prezidente Repúblika promulga, nune’e bainhira lei ruma garantia iha direitu sidadaun hodi defende povu nia direitu tuir konstituisaun no bainhira la prevee mak sei veta ho razaun haruka fila hodi hadia mak promulga,” Nia akresenta

Atuál Xefe Estadu ne’e hateten, antes ne’e nia-parte veta alterasaun lei fundu petroliferu iha tempu Aliansa Maiória Parlamentár (AMP) nian atu hasai osan hosi fundu mina-rai la liuhosi Parlamentu Nasionál.

Kandidatu Prezidente Republika períodu 2022-2027, Francisco Guterres Lú Olo, halo kampana ho tipu diálogu iha salaun Parokiál Same Vila, segunda (04/04). Imajen Tatoli/Anito Santos.

“Ha’u rasik Prezidente estuda no haree lei ne’e la loos no veta, ne’ebé haruka ba Tribunál Rekursu husu fiskalizasaun abstrata maibé Tribunál nia desizaun hanesan mós. Maibé altura ne’ebé Parlamentu Nasionál la satisfas, nune’e la to’o semana ida haruka fali mai alterasaun lei ne’e. Maibé ninia sentidu hanesan nafain, nune’e veta no ikus mai revizaun ne’e la haruka to’o mai agora,” nia dehan.

Kandidatu hosi partidu Fretilin ne’e, reafirma pozisaun kandidata an ba mandatu daruak eleitu sei dignifika de’it ba konstituisaun ba kna’ar ne’ebé atribui ba Xefe Estadu hodi servi povu, tanba povu nia vontade no direitu ne’e hanesan prinsípiu fundamentál.

“Lejitimidade direta ho funsaun halo konstituisaun halo aprova, tau vontade povu hodi defende interese povu Konstituisaun asembleia primeiru original, ami ne’ebé tur iha ne’ebá hakerek no aprova ne’ebé vontade povu nian. Signifika lejitimidade hili hosi povu hanesan eleisaun,” nia hateten.

Enkuantu, iha kampaña ho tipu diálogu ne’e partisipa hosi Sekretáriu Jerál Partidu Fretilin, Mari Alkatiri, Vise Prezidente PLP  Diometro Amaral no hetan partisipasaun  másimu hosi militante no kuadru estrutura  partidu Fretilin, Partidu Libertasaun Populár (PLP), partidu Kmanek Haburas Unidade Nasionál Timoroan (KHUNTO), kandidatu partidu Os Verdes no seluk tan.

Diálogu ne’e mós hetan supervizaun hosi Komisaun Nasionál Eleisaun (CNE,siglá portugés), observadór internasionál, Provedória Direitu Umanu no Justisa (PDHJ) no mós hetan seguransa másimu hosi Komandu Polísia Nasionál Timor-Leste (PNTL) munisípiu Covalima no kampaña ne’e kumpre oráriu hosi órgaun eleitorál hahú iha  tuku 11h00.

Tuir oráriu, kandidatu PR ho númeru sorteiu rua (2), Lú Olo, sei kontinua hala’o kampaña ba loron dahaat sei hala’o iha 05 abríl iha munisípiu Aileu.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here