Kandidatu Prezidente Republika períodu 2022-2027, Francisco Guterres Lo Olo, hato’o kompromisu polítiku durante kampaña. Imajen TATOLI/Anito Santos.

COVALIMA, 03 abríl 2022 (TATOLI)—Kandidatu Prezidente Repúblika ba períodu 2022-2027 ho númeru sorteiu 2, Francisco Guterres Lú Olo, domingu ne’e hala’o abertura kampaña loron daruak ba eleisaun prezidensiál segunda volta iha kampu futebol Suai, munisípiu Covalima.

Notísia Relevante: Kampaña abertura: Lú Olo koordena ho ezekutivu fó prioridade ba povu nia moris di’ak

Lú Olo hato’o nia kompromisu katak, bainhira reeleitu sai sai Xefe Estadu sei hametin Estadu direitu demokrátiku hodi kumpre liu konstituisaun sei la hakruuk ba ema ida nia vontante tanba konstituisaun kesi metin sidadaun nia direitu iha ne’eba.

“Atu sai Prezidente Repúblika tenke hetan lejitimidade vontade povu, nune’e ho hanoin mai respeitu povu nian hodi kontinua servi povu ida-ne’e,” Lú Olo hateten apoiante sira, domingu ne’e.

Rai Timor-Leste nu’udar Estadu repúblika demokrátiku hatur iha lei inan katak Prezidente Repúblika kumpre de’it knar tuir konstituisaun haruka nu’udar órgaun la’ós  servisu mesak sai Xefe Estadu no hatene servisu ho órgaun sira seluk hanesan Parlamentu Nasionál, Governu no Tribunál Rekursu sei la interfere kompeténsia maibé bele halo tuir lei ne’ebé iha interdepedénsia ba malu.

“Órgaun sira-ne’e sai hanesan rin ba nasaun Repúblika ho ida-ne’e sei halo tuir vontade povu nian halo tuir de’it konstituisaun,” nia hateten.

Bainhira eleitu mak sei sai Prezidente Repúblika ba povu tomak hodi hala’o Dezenvolvimentu sustentavel no importante, garante pás no estabilidade hodi hadi’a dezenvolvimentu povu ida ne’e nia moris, tanba tinan barak ona Timor-Leste ukunaan maibé povu barak sei hasoru problema bee-moos, estrada no seluk tan nune’e presiza hadia buat barak atu bele benefisía povu.

Nia dehan, hanesan atual Prezidente Repúblika antes ne’e mós halo ona vizita mai iha Covalima (Suai) nota katak hasoru problema bee-moos no iha informasaun katak iha ona estudu balun atu dada bee iha munisípiu ne’e, ho ida-ne’e bainhira eleitu mak sei hamutuk ho Governu hodi tau atensaun.

Ne’ebé sei haree Orsamentu Jerál Estadu kada tinan bainhira Parlamentu Nasionál aprova haruka ba gabinete PR mak sei estuda hodi haree tau atensaun ba nesesidade povu.

No sai Xefe Estadu halibur ho timor-oan hotu buka diálogu tur hamutuk hodi rona ema seluk nia hanoin no ko’alia diferensia sira ne’ebé iha hodi fó solusaun no fó ksolok ba povu.

Tanba ne’e, nia husu militante no apoiante ho povu tomak atu vota ba nia kandidatura hodi fó vitória iha eleisaun segundu volta.

“Tanba ne’e, vota mai ha’u, iha loron 19 abríl no ha’u prontu atu bele hala’o servisu. No, ha’u kontente imi-nia votu fó ona iha primeiru no fiar votu sei aumenta no manán iha Suai-Covalima iha segunda volta,” nia hateten.

Apoiante Kandidatu PR Lu Olo iha Suai-Covalima. Imajen Tatoli/Anito Santos.

Prezidente Repúblika nia kompeténsia ida mak sai hanesan Komandante Supremu forsa armada, nune’e dbainhira eleitu mak sei ko’alia ho Governu oinsá hakarak instituisaun militár sai operasionál modernu ho kondisaun, nune’e bele sai lutu ba nasaun no presiza aumenta membru foun hodi kompleta, no mós sei ko’alia oinsá hadi’a kondisaun PNTL hodi fó seguransa ba povu.

Konselleiru Másimu Partidu KHUNTO, José dos Santos Naimori Bukar, hateten kandidatu Lú Olo  povu Timor-Leste kuñese ona tinan 24 nia laran la dúvida, nune’e militante KHUNTO  hamutuk 3000-resin iha Covalima hamutuk ho povu tomak sei la vota sala hodi fó vitória ba kandidatu hosi partidu FRETILIN ne’e.

Nia dehan, oitavu Governu forma hosi plataforma entendimentu hosi partidu tolu KHUNTO, Fretilin, PLP ne’ebé forte nune’e konvida povu tomak atu vota ba Lú Olo sai Xefe Estadu servisu hamutuk ho Governu hodi implementa programa moris di’ak povu nian.

Enkuantu, iha kampaña ne’e partisipa hosi Sekretáriu Jerál partidu Fretilin, Mari Alkatiri, Vise Prezidente PLP, Deometro Amaral, Konselleiru Másimu Partidu KHUNTO, José Naimori Bukar, no hetan partisipasaun  másimu hosi militante partidu Fretilin, Partidu Libertasaun Populár (PLP), partidu Kmanek Haburas Unidade Nasionál Timoroan (KHUNTO), kandidatu partidu Os Verdes no seluk tán.

Kampaña ne’e mós hetan supervizaun hosi Komisaun Nasionál Eleisaun (CNE,siglá portugés), observadór internasionál, Provedória Direitu Umanu no Justisa (PDHJ) no mós hetan seguransa másimu hosi Komandu Polísia Nasionál Timor-Leste (PNTL), munisípiu Covalima, no kampaña ne’e kumpre oráriu hosi órgaun eleitorál hahú iha tuku 15h00 lorokraik.

Tuir oráriu, kandidatu PR Lú Olo iha loron 04 abríl aban sei kontinua hala’o nia kampaña iha munisípiu Manufahi.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here