Komunidade iha suku Leimea Sorin Balun, postu administrativu Hatolia, munisípiu Ermera, kolleta kafé iha plantasaun. Imajen TATOLI/António Gonçalves

DILI, 01 abril 2022 (TATOLI)–Ministériu Agrikultura no Peska (MAP) planeia ona halo kultivasaun, anualmente, ba ektare 500 kafé iha munisípiu Ermera, Liquiçá, Bobonaro, Aileu, Ainaro, Manufahi, Manatuto, no Baucau. 

Diretór Jerál Floresta, Kafé no Planta Industriál hosi MAP, Raimundo Mau, hateten, Governu fó prioridade ba reabilitasaun plantasaun kafé kada tinan, atu tesi kafé tuan nia hun hodi kuda kedas kafé oan, nune’e liu tinan-tolu ka haat ba oin bele troka ho foun.

“Ita sei kuda kafé-oan ektare 500 ba área ne’ebé ita loke foun, kafé ne’ebé atu kuda daudaun ne’e prepara ka prodús iha sentru viveiru planta indústria iha Fatukero, Ermera, ne’ebé tinan ne’e ita prodús 500.000 hanesan kafé oan no ai-indústria sira seluk hanesan baunilla, kakau maibé, barak liu kafé oan,” Diretór Jerál hateten ba Agência TATOLI, iha ninia knaar fatin MAP, Caicoli, sesta ne’e.

Notísia relevante: Expo Dubai 2020: Kafé Timor atrai turista vizita pavillaun Timor-Leste

MAP sei distribui kafe-oan inklui ai-mahon ba kafé oan ba agrikultór kafé sira ne’ebé mak hakarak kuda, ne’ebé prodús iha sentru plantasaun iha Gleno.

“Kafé oan ne’ebé daudaun prepara sei distribui konforme proposta ne’ebé hato’o hosi agrikultór kafé iha munisípiu ida-idak, maibé sura mós atividade viveiru hosi parseiru sira seluk, ne’ebé sei fahe bazeia ba identifikasaun inisiál ba parte ne’ebé mak presiza atu kuda kafé,” nia akresenta.

Ministériu prevee ona orsamentu hamutuk $500.000 ba programa kafé iha tinan ne’e.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here