Plantasaun Kafé. Imajen/Timor-Leste Tourism

DUBAI, 16 outubru 2021 (TATOLI)—Ministru Agrikultura no Peska (MAP), Pedro dos Reis, hateten Governu Timor-Leste komprometidu atu promove Kafé Timor-Leste no Baunila ba mundu liuhosi Expo Dubai 2020.

Notísia Relevante: TradeInvest organiza enkontru ho parseiru dezenvolvimentu iha Dubai

Nia hateten, produtu agrikóla hanesan Kafé Timor no Baunila atrai tebes turista lokál no internasionál nia matan no sira interese bele vizita pavillaun Timor-Leste, tanba iha loron 15-16 outubru (sesta no sábadu) ne’e vizitante hamutuk 3000 mak mai koko Kafé nia morin no koko rasik saida mak sira horon.  

“Kafé no Baunila sai númeru um (1) iha pavillaun Timor-Leste. Produtu rua ne’e atrai ema, hosi nia morin ne’ebé mak furak no loke ema-nia laran hodi mai koko no sente rasik saida mak sira horon. Durante establese pavillaun iha Expo Dubai 2020 iha fulan setembru fulan kotuk, produtu agrikóla Timor nian interesante tebes hodi atrai vizitante sira,” Pedro dos Reis hateten ba jornalista sira iha AL Wasl Plaza, Expo Dubai 2020, sabadu ne’e.

Governu Timor-Leste iha responsabilidade tomak atu dezenvolve produtu Kafé no Baunila iha Timor-Leste, hodi kapasita to’os-na’in sira atu hakbiit sira iha produsaun Kafé no Baunila nomós at asegura Kafé nia kualidade.

Maske iha situasaun pandemia COVID-19 nia laran, nia informa, parseiru Coperativa Café Timor (CCT) konsege sosa ona tonelada 19.000 hodi exporta ba nasaun seluk.

Tuir nia, xave importante ba Kafé Timor no Baunila mak nu’udar produtu organika, tanba agrikultór sira mak kuda ona Baunila ektare 30 no oras ne’e MAP estende tan iha munisipiú Aileu no Manufahi.  

Produsaun rai-laran sei la sufisiente hodi responde ba merkadu mundiál, tan ne’e Governu sei serbisu makaas hodi hasa’e produtu rai-laran atu responde ba merkadu internationál.

Diretór Pavillaun Timor-Leste, Edson Robert Noronha Lopes, informa ekipa iha responsiblidade tomak hodi fahe informasaun ba vizitante sira atu komprende di’akliu kona-ba nasaun Timor-Leste nia produtu hanesan Kafé no Baunila.

Vizitante no Turista hosi Lebanon, Riyad Awada, sente satifas ho produtu kafé tanba gosta tebes bainhira hemu Kafé Timor.

“Ha’u sente kontente. Ha’u gosta tebes bele visita imi-nia pavillaun. Ha’u mai nu’udar turista ida, hodi buka hatene kona-ba kafé nia morin no finalmente ha’u hetan no horon morin ne’e iha pavillaun Timor-Leste nian,” Riyad Awada hateten.

Produtu lokál sira ne’ebé demonstra no halo promosaun iha eventu exibisaun extrordináriu iha Expo Dubai 2020 mak hanesan Kafé, Baunila, produtu Artezenatu, Tais, nomós informasaun kona-ba área petróleu, minerál, turizmu komérsiu no indústria.

Produtu hirak ne’e faan ba vizitante sira ho nia folin tuir kada produtu no ida folin boot mak kafé ho folin $55.20 no artezenatu ho folin $276.06.

Tuir dadus ne’ebé rekolla husi komisaun organizadora Expo Dubai 2020 hatudu katak ema 11.000-resin mak vizita ona pavillaun Timor-Leste.

Jornalista : José Belarmino De Sá

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here