Reprezenta Diretor Ezekutivu CNC, Diretór Relasaun Externa no Komunikasaun iha Centro Nacionál Chega (CNC), Gaudensio Sousa, entrega premiu ba jestór radiu Maubisse Mauloko, Joaquim Continu Mendonca. Imajen Tatoli/Nelia Fernandes.

AINARO, 31 marsu 2022 (TATOLI)—Centro Nacionál Chega (CNC), kinta (31/03) ne’e atribui prémiu ba jestór rádiu komunidade 15 iha Timor-Leste nu’udar apresiasaun ba kooperasaun servisu liuhosi diseminasaun informasaun ba komunidade sira ho pás liu-liu disemina konteúdu rekomendasaun hosi relatóriu CAVR “Chega!”.

Notísia Relevante: CNC-CI fasilita formasaun “Jornalizmu ba Pás” ba jornalista 34

Diretór Relasaun Externa no Komunikasaun iha Centro Nacionál Chega (CNC), Gaudensio Sousa, hateten prémiu ida-ne’e CNC atribui ba rádiu komunidade sira tanba servisu hamutuk iha diseminasaun informasaun ne’ebé CNC halo no rádiu komunidade fasilita hodi transmite iha sira-nia munisípiu idak-idak iha tinan kotuk.

“Foin daudaun iha tinan kotuk mós prémiu balun entrega ba Konsellu Imprensa, tanbá hanesan parseriu. Ida-ne’e foku de’it ba parseiru estrátejiku CNC ni’an ne’ebé tulun CNC iha prosesu diseminasasaun informasaun ba komunidade sira ho pás hosi rekomendausan sira iha relatóriu Chega!,” Gaudensio Sousa hateten lia hirak ne’e iha ámbitu enseramentu formasaun ba jornalista 34 kona-bá “Jornalizmun ba Pás” ho tema “Promove no Proteze Direitu Umanu hodi Kontribui ba Paz no Estabilidade iha rai laran” iha Salaun Paróquia Imaculado Coraçáo de Maria, Maubisse, kinta ne’e.

Jestora Rádiu Komunidade Matebian, Dulce Santina Belo, agradese ba CNC ne’ebé durante tinan rua (2) halo kooperasaun hamutuk ho rádiu komunidade sira hodi transmite informasaun ne’ebé fó hosi CNC, liuhosi kanál rádiu ba komunidade ho programa Chega! ba Esperansa no ita-nia memória.

“Ho programa ne’e, ha’u hanoin katak bele fó hanoin mós ba ita-nia komunidade sira iha área remotas, hodi bele loke sira-nia hanoin oinsa atu bele hato’o sira-nia problema hirak ne’ebé durante ne’e sira hasoru, liga ho programa ne’ebé CNC oferese,” nia hateten.

Entretantu, iha atribuisaun prémiu ba jestór  ne’e, CNC atribui ba rádiu komunidade 15 hanesan Rádiu Komunidade Lian Manukoko Atauro, Rádiu Komunidade Matebian Baucau, Rádiu Coulelemai Sahe Bucoli Baucau, Rádiu Komunidade Mauloko Maubisse, Rádiu Komunidade Manufahi, Rádiu Komunidade Maliana.

Prémiu ne’e mós ba Rádiu Komunidade Covataroman Suai, Rádiu Komunidade Tatamalau Ainaro, Rádiu Komunidade Lospalos, Rádiu Komunidade Povu Viqueqeu, Rádiu Komunidade Tokodede Liquiça, Rádiu Komunidade Raihusar Aileu no Rádiu Komunidade Atoni Lifau Oé-Cusse.

Jornalista : Nelia Fernades

Editór       : Cancio Ximenes  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here