Jornalista na’in-35 hosi mídia online, jornál, rádiu no televizasaun, inklui mós jestora no jestór hosi rádiu komunidade sira iha territóriu nasionál tuir formasaun Jornalizmu ba Pás ne’ebé CNC no CI fasilita. Imajen Tatoli/Nelia Fernandes.

AINARO, 30 marsu 2022 (TATOLI)—Centro Nacional Chega (CNC) hamutuk ho Conselho de Imprensa (CI), kuarta ne’e fó formasaun ba jornalista na’in-34 kona-ba ‘Jornalizmu ba Pás’ ho tema “Promove no Proteje Direitu Umanu hodi Kontribui ba Pás no Estabilidade iha Rai-laran”.

Diretór Centro Nacional Chega (CNC), Hugo Maria Fernandes, hateten CNC ho CI iha kooperasaun ida ho nia baze fundamentál, oinsá implementa rekomendasaun hosi relatória CAVR “Chega!” tanba relatóriu ne’e hateten momoos fó enfaze forte ba entidade públiku, liu-liu entidade Estadu sira atu valóriza knar jornalista sira-nian iha Timor-Leste.

“Ita haree tinan 24, ita luta ba ukun rasik an, entidade ne’ebé fó nia kontribuisaun signifikante tebes ba ita-nia luta mak mundu jornalizmu, liuhosi jornalista sira-nia knar, entaun ida-ne’e sai tiha komponente importante iha ita-nia istória. Tanba ne’e, CI no CNC nu’udar entidade Estadu tenke kontinua valóriza liuhosi atividade oioin hanesan fó formasaun ba jornalista sira atu kontinua hametin sira-nia kapasidade no abilidade iha promosaun ba direitu umanu,” Hugo Maria Fernandes hateten ba jornalista sira iha Salaun Paróquia Imaculado Coraçáo de Maria, Maubisse, kuarta ne’e.

Nune’e, nia dehan, tenke fó dignifikasaun ida ba jornalista sira tanba CI no CNC kontinua akompaña obra jornalista sira-nian ne’ebé promove pás no direitu umanu, liuhosi atribuisaun prémiu jornalista ba pás Maria Gorreti, entaun ida-ne’e maneira ne’ebé Estadu halo nu’udar resposta ba rekomendasaun “Chega!”.

“Ho eventu sira-ne’e, nu’udar komponente hosi atividade ne’ebé CI no CNC halo ne’e atu promove jornalizmu ba pás, liu-liu hametin kapasidade jornalista sira-nian atu iha liután konsiénsia ne’ebé di’ak kona-bá saida mak pás, direitu umanu no saida mak jornalista sira bele halo hodi promove asuntu direitu umanu nian,” nia dehan.

Diretór Analiza no Dezenvolvimentu Mídia iha Conselho de Imprensa (CI), Alberico da Costa Junior, akresenta matéria ne’ebé CI fó iha formasaun ne’e mak dahuluk kona-bá mídia ninia papél hodi promove pás no estabilidade.

Tanbá, nia dehan, mídia nu’udar instrumentu propaganda polítiku bainhira polítiku sira mak kaer ka ema balun uza sai hanesan instrumentu polítiku hodi halo promosaun ba sira-nia an.

Aleinde matéria ne’e, iha mós matéria prinsípiu jornalizmu hodi fó hanoin ba jornalista sira bele komprende prinsipiu sira-ne’e, nune’e sira bele la’o tuir bazea ba sira-nia planu kobertura, no matéria prinsipál seluk mós mak direferensa entre jornalizmu pás no jornalizmu konflitu.

“Prinsipálmente ho matéria sira-ne’e bele ajuda sira, bainhira iha konflitu ka situasaun manas ruma sira bele hamenus konflitu, nune’e labele dirije to’o violénsia,” nia dehan.

Jestora Rádiu Coulelemai Sahe Bucoli, Josefina da Costa, sente kontente ho formasaun refere tanbá bele aumenta nia abilidade no koñesimentu kona-ba jornalizmu pás.

“Ha’u-nia esperansa ba oin CNC ho CI kontinua nafatin fó formasaun ne’e, atu bele hasa’e liután ami-nia koñesimentu iha jornalizmu ba pás ne’e,” nia espera.

Entretantu, partisipante ba formasaun ne’e hamutuk na’in-34 ne’ebé kompostu hosi jornalista sira maihosi mídia online, jornál, rádiu no televizasaun, inklui mós jestora no jestór hosi rádiu komunidade sira iha territóriu nasionál.

Jornalista : Nelia Fernandes

Editór       : Cancio Ximenes   

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here