DILI, 30 marsu 2022 (TATOLI)— Diretora Servisu Saúde Munisípiu (SSM) Dili, Agostinha Segurado, hateten, ekipa saúde munisípiu Dili kontinua halo fumigasaun iha área risku dengue hanesan iha postu Adminsitrativu Don-Aleixo, Na’in Feto, Cristo Rei, Vera-Cruz no Metinaro.
“Ita kontinua foku halo fomigasaun ba área risku sira hodi prevene moras dengue iha komunidade nia leet. Maibé ita haree katak hafoin halo intervensaun udan mai fali ona ne’e susuk tenke mosu fali ne’e mak dezafiu boot ida ba ita,” Diretora ne’e hateten ba jornalista sira iha Xanana Sport Center-Bairru Grillos-Dili, kuarta ne’e.
Atu prevene dengue, Ministériu Saúde hamutuk ho Autoridade Munisípiu Dili halo sensibilizasaun informasaun ba kombate moras dengue ba lider komunitariu munisípiu Dili atu halo mobiliza komunidade ba jestaun kontrola lixu.
“Kazu aumenta bebeik ne’e ita falla iha intervensaun, maibé presiza mós kontribuisaun komunidade hotu nian atu limpeza jerál hodi prevene dengue iha Dili liuliuTimor-Leste,” nia sujere.
Nune’e, apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.
Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.
Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.
Iha fatin biban hanesan, Sekretáriu Adjuntu Munisípiu Dili, Antonio Calau Moniz husu ba lider komuniatriu sira liuliu Xefe Aldeia atu fó informasaun ba komunidade sira hodi halo limpeza iha sira ida-idak nia hela fatin atu kombate dengue.
Entretantu, Sekretáriu Jerál Cruz Vermella Timor Leste, Luis Pedro Pinto, hateten sensibilizasaun informasaun kona-ba kombate moras dengue ba lider komuniatriu sira hanesan pilar importante hodi kombate surtu dengue.
Pasiente dengue 3.713 no óbitu 44
Diresaun Nasionál Saúde Públika liuliu Departamentu Vijilansia Epidemolojia iha Ministériu Saúde, hahú fulan-janeiru to’o horisehik, rejista pasiente dengue 3.713, hosi númeru labarik na’in-44 lakon vida.
Maioria kazu ne’e deteta iha Munisípiu Dili ho totál 2.465 Baucau 236, Manatuto 169, Covalima 126, Ermera ho kazu 90, Manufahi 155, Viqueque 61, Ainaro 45, Liquiça 106, Aileu 85 no Bobonaro 44 Lautem 126 no RAEOA lima .
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 429, Klínika Fatumeta 239 sentru saúde Comoro 840, sentru saúde Vera-Cruz 202, sentru saúde Formoza 409, sentru saúde Becora 238, klinika madre eliza ida, sentru saúde Atauro 11, sentru saúde Metinaro 34 klínika Bairru-Pité 59, klínika Motael na’in-rua no klínika Moris Foun na’in-ida.
Notísia relevante: Prevene dengue, MS enkoraja komunidade halo limpeza jerál
Jornalista : Felicidade Ximenes
Editór : Florencio Miranda Ximenes