DILI, 29 marsu 2022 (TATOLI)—Ministériu Saúde (MS) enkoraja ba Autoridade Munisipál no Autoridade Lokál atu bele orienta komunidade halo limpeza jerál iha suku no bairru sira hodi prevene moras dengue iha Timor-Leste.
“Apela mós Autoridade Munisipál no Autoridade Lokál atu bele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dala ida,” refere nota ne’ebé Agência TATOLI asesu, tersa ne’e.
Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.
Tanba tuir dadus hosi Diresaun Nasionál Saúde Públika liuliu Departamentu Vijilánsia Epidemolojia iha Ministériu Saúde, hahú janeiru to’o horiseik pasiente dengue sa’e ba 3.667, hosi númeru ne’e labarik na’in-44 mak mate.
Maioria kazu ne’e deteta husi Munisípiu Dili ho totál 2.435, Baucau 236, Manatuto 167, Covalima 126, Ermera ho kazu 90, Manufahi 151 Viqueque 58, Ainaro 45, Liquiça 105, Aileu 85 no Bobonaro 43 Lautem 121 no RAEOA haat .
Munisípiu Dili nafatin rejista kazu ne’ebe a’as iha primeira semana desimu primeiru semana fulan marsu 2022, ho totál kazu 2.435 kazu. Por enkuantu nono no desimu semana kazu komesa reduz.
To’o ohin loron desimu primeiru semana fulan marsu 2022, kazu dengue hosi postu administrativu Dom Alexo iha 1373, Cristo-Rei 422, Vera-Cruz 272 no Nain-Feto 315.
Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 427, Klínika Fatumeta 239 sentru saúde Comoro 822 sentru saúde Vera-Cruz 202, sentru saúde Formoza 402, sentru saúde Becora 235, klinika madre eliza ida, sentru saúde Atauro 11, sentru saúde Metinaro 34, klínika Bairru-Pité 59, klínika Motael na’in-rua no klinika Moris Foun ida.
Notísia relevante: Dili nafatin rejista kazu dengue ho númeru a’as
Jornalista : Felicidade Ximenes
Editór : Florencio Miranda Ximenes
