Ámbitu konferénsia nasionál kona-ba mudansa klimátika tinan 2022, iha salaun Ministériu Finansa, Aitarak-laran, tersa (29/03). Imajen TATOLI/Francisco Sony

DILI, 29 marsu 2022 (TATOLI)–Sekretáriu Estadu Ambiente (SEA) liuhosi Diresaun Nasionál Alterasaun Klimátika ho parseiru internasionál sira, tersa ne’e, realiza atividade konferénsia nasionál kona-ba alterasaun klimátika 2022 ba da-IV.

Konferénsia ne’e ho tema ‘Redús impaktu alterasaun klimátika atu salva guarda ekosistema, saúde no seguransa alimentár’.

Sekretáriu Estadu Ambiente, Demétrio do Amaral de Carvalho, konsidera konferénsia ne’e importante ba Timor-Leste hodi haree pozisaun entidade hotu ba adaptasaun no migasaun hasa’e reziliénsia hasoru efeitu alterasaun klimátika.

Sekretáriu Estadu Ambiente, Demétrio do Amaral de Carvalho. Imajen TATOLI/Francisco Sony

“Timor-Leste hanesan nasaun ida hosi nasaun 10 ne’ebé vulnerável loos hasoru dezastre hosi alterasaun klimátika, tanba ne’e konferénsia ne’e importante tebes ba ita hosi nível liña ministeriál, atu tau hanoin hamutuk iha prátika no halo reflesaun ba saida mak halo ona no saida mak seidauk, nune’e bele hadi’a servisu iha área alterasaun klimátika,” Sekretáriu Estadu Demétrio do Amaral, hateten iha salaun Ministériu Finansa, Aitarak-laran.

Notísia relevante: Governu prioritiza alterasaun klimátika hodi atinje ekonomia sustentável

Inisiativa ne’e ho hanoin Governu bele iha kapasidade nasionál ba atuasaun no mitigasaun problema ambientál sira, tanba liuhosi públikasaun peskiza hosi Programa ba Nasaun Unidade ba Dezenvolvimentu (UNDP, sigla portugés) ne’ebé halo iha fulan-rua liubá, públika katak Governu Timor-Leste nia gastu públiku ba setór área alterasaun klimátika atinje 6%.

“Tanba ne’e, Governu iha kompromisu forte ba alterasaun klimátika, ita hakarak hamutuk ho ajénsia kooperasaun sira no embaixada iha Timor-Leste ne’ebé tulun ba nasaun sira seluk, katak bainhira iha vontade polítika no definisaun programa di’ak iha nasaun ida, mak bele tau rekursu boot liután. Ha’u hakarak dezafia iha tinan 2023, se bele orsamentu ba gastu públiku ba alterasaun klimátika no ambiente bele sa’e liután hosi 6% ba 10%, tanba fundu globál liuhosi Uniaun Europeia ne’ebé mai Timor-Leste kada tinan milliaun $16,” governante ne’e dehan.

Ba Sekretáriu Estadu, luta hasoru alterasaun klimátika ne’e nu’udar luta  koletivu ida, nune’e nia parte agradese ba parseiru sira-nia kontribuisaun no vontade atu halo Timor-Leste sai reziliénte liu hosoru efeitu sira hosi alterasaun klimátika.

Alterasaun klimátika amesa boot ba dezenvolvimentu

Iha fatin hanesan, Ministériu Koordenadór Asuntu Ekonómiku (MKAE), Joaquim Amaral, ne’ebé reprezenta Primeiru-Ministru, Taur Matan Ruak, iha konferénsia ne’e hateten, ámbitu ne’e importante tebes tanba alterasaun klimátika sai ameasa boot ba Timor-Leste nia dezenvolvimentu no país hotu iha mundu.

“Impaktu hosi alterasaun klimátika mak hanesan hamosu inundasaun, rai-halai, bailoron naruk, no seluk tan, ne’ebé fó ameasa boot ba ita-nia vida ekonomia sosiál, infraestrutura, seguransa, ai-han no sustentabilidade ekosistema,” governante ne’e dehan.

Notísia relevante: Governu lansa relatóriu despeza públika alterasaun klimatika no revizaun institusionál

Bazeia ba relatóriu balun hosi komunikasaun nasionál, hatudu katak temperatura Timor-Leste nia hahú sa’e ona grau sélsiu (oc) 0,16 no tasi kada tinan sa’e mili metru 0,5, ne’ebé halo rai aumenta manas no bee-matan neneik sei lakon hosi rai-maran.

“Dadus sira ne’e hatudu mai ita katak alterasaun klimátika iha ona ita-nia rai no fó ona impaktu negativu ba dezenvolvimentu nasionál. Alterasaun klimátika mosu tanba atividade umanu ne’ebé hasa’e gás efeitu estufa ba atmósferu hodi ikus mai hamosu akesimentu globál ne’ebé hanaran alterasaun klimátika,” nia akresenta.

Ministru dehan, atu hamenus impaktu alterasaun klimátika hodi garante setór saúde no ekosistema seguransa ai-han, maka parte hotu iha obrigasaun tau-atensaun ba kestaun alterasaun klimátika, hosi asaun adaptasaun no mitigasaun, ne’ebé polítikamente VIII Governu konstituisionál aprova ona polítika nasionál alterasaun klimátika dezembru 2021.

“Governu konsiente katak kualker estratejia mitigasaun kombate alterasaun klimátika tenke liuhosi kooperasaun globál. Tanba ne’e, liuhosi konferénsia ne’e ita hamutuk ho parseiru sira bele redefine filafali estratejia ba alterasaun klimátika,” nia hateten.

Atividade ne’e realiza durante loron rua, hahú loron 29 to’o 30 marsu, ne’ebé hetan partisipasaun hosi parseiru sira hanesan USAID, Plan Internaisonal, ILO, WFP, CRS, UNICEF, OXFAM, UN, IOM, WHO, UNDP, WaterAid, Mercy Corps, Cruz Vermella Timor Leste, Fundasaun Carbon Offset Timor.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here