Sekretáriu Estadu Ambiente, Demétrio do Amaral de Carvalho. Imajen Tatoli/António Gonçalves

DILI, 25 janeiru 2022 (TATOLI) – VIII Governu Konstitusionál prioritiza ba alterasaun klimátika hodi aumenta setór ambiente nu’udar pilár ba dezenvolvimentu atu atinje ekomonia sustentável iha Timor-Leste.

Sekretáriu Estadu Ambiente (SEA), Demétrio do Amaral de Carvalho, hateten, Governu Timor-Leste konsidera setór ekonomia ida-ne’ebé reziliente, tanba ne’e presiza investe iha área alterasaun klimátika ne’ebé mak governu anteriór seidauk tau prioridade nu’udar pilár importante ba dezenvolvimentu.

Nune’e mandatu prioridade VIII Governu Konstitusionál aumenta tán pilár ambientál nu’udar setór inportante hodi kompleta tán pilar haat seluk hanesan kapitál sosiál, infraestrutura, ekonomia no dezenvolvimentu institusionál.

“VIII Governu Konstitusional aumenta tán pilár ida mak ambiente, purtantu ita iha pilár lima ba dezenvolvimentu sustentável nian,” SEA Deométrio informa ba Agénsia TATOLI iha nia kna’ar- fatin, tersa ne’e.

Ho desizaun refere, hahú ba oin governu sei halo esforsu hotu hodi haree alokasaun ka gastu públiku ba área ambiente hafoin SEA rasik partisipa iha Konferénsia Nasaun Unida kona-ba Mudansa Klimátika (COP26, sigla inglés) iha Glasgow.

Rezultadu hosi levantamentu dadus ne’ebé hala’o hosi UNDP inklui ajénsia internasionál seluk konklui katak gastu públiku Timor-Leste nian iha área alterasaun klimátika hosi tinan 2018 to’o 2020 gravikamente hahú sa’e besik pursentu 6.

Nune’e estadu foti resposablidade boot atu redus impaktu sira hosi alterasaun klimátika ba povu liuhosi hasa’e reziliénsia infraestrutura, agrikultura, ekonomia atu nune’e Timor-Leste sai país ne’ebé reziliente liu hodi hasoru dezastre sira hosi mudansa klimátika.

“Timor-Leste ninia emisaun ki’ik hela purvolta 0,003% hosi emisaun globál tanba ne’e loloos laiha obrigasaun tuir konvensaun alterasaun klimátika ninian atu halo investimentu ba área públiku maibé ita nafatin hakarak hatudu ba mundu katak hanesan país ne’ebé hatudu lideransa,” Demétrio akresenta.

Hanesan durante tinan tolu (2018-2021) Timor-Leste mobiliza ona fundu internasionál hamutuk millaun $55 hosi fundu klimátika verde inklui reforsa tán orsamentu hosi fundu globál ambientál millaun $16 no iha meadu tinan 2022 sei asesu tán millaun $16.

Nune’e to’o tinan 2022 remata Timor-Leste sei mobiliza fundu totál hosi global ambientál facility purvolta millaun $30-resin no totál hamutuk hosi fontes rua refere alterasaun klimátika besik millaun $80.

Fundu hirak-ne’e hahú implementa projetu130 hanesan infraestrutura fíziku iha árer rurál liuhosi projetu estrada rurál, irrigasaun, kanalizasaun bee-moos, esgotu ne’ebé fonte finanaseiru hosi Governu no implementa ona iha munisípiu neen hanesan Baucau, Lautem, Viqueque, Aileu, Ermera no Liquiçá.

Totál orsamentu ba projetu 130 ne’e hamutuk millaun $55 ne’ebé defini iha Ministériu Admistrasaun Estatál (MAE) liuhosi Programa Nasional Dezenvolvementu Suku (PNDS), Ministeiru Agrikultura no Peska (MAP) reflorestasaun nian, Sekretaria Estadu Protesaun Sivíl (SEPS) ba atividade sira hodi redus dezastre naturál nian.

Jornalista         : Natalino Belo

Editór               : Evaristo Soares Martins  

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here