MESSK disemina dekretu-lei nú 3/2022 kona-ba padraun kurríku nasionál ba reprezentante universidade sira, iha salaun UNITAL, Becora, tersa (29/03). Imajen TATOLI/Francisco Sony

DILI, 29 marsu 2022 (TATOLI)—Ministériu Ensinu Superiór Siénsia no Kultura (MESSK), tersa ne’e, realiza atividade diseminasaun dekretu-lei númeru 3/2022, 12 janeiru kona-ba rejime jurídiku kurríkulu padraun nasionál ba Instituisaun Ensinu Superiór Públiku no Privadu (IESPP) 18.

Inisiativa ne’e tanba dekretu-lei ne’e publika ona iha Jornál Repúblika hodi regula sistema bináriu Ensinu Superiór Universitáriu no tékniku sira.

Ministru Ensinu Superiór Siénsia no Kultura, Longuinhos dos Santos, halo abertura ba atividade dekretu-lei nú 3/2022 kona-ba padraun kurríku nasionál ba reprezentante universidade sira, iha salaun UNITAL, Becora, tersa (29/03). Imajen/MESSK

“Dekretu-lei kurríkulu padraun nasionál ne’e, ninia benefísiu mak hanesan uniformiza kurríkulu padraun nasionál iha Instituisaun Ensinu Superiór hotu, inklui sistema kréditu, no sistema avaliasaun inklui Lei Baze Edukasaun atu garante estudante sira bele hetan koñesimentu mínimu no nesesáriu ba prestasaun nian,” Ministru Ensinu Superiór Siénsia no Kultura, Longuinhos dos Santos, informa iha salaun Universidade Orientál Timor-Leste (UNITAL), Becora, tersa ne’e.

Notísia relevante: Governu estabelese rejime jurídiku kurríkulu padraun nasionál ensinu superiór

Lejizlasaun ne’e bele garante estudante sira sai empreendedór hodi bele halo mobilidade no kompete iha nível nasionál no internasionál, liu-liu kona-ba merkadu traballu nian.

“Husu ba Instituisaun Ensinu Superiór sira atu diseminasaun dekretu-lei ne’e hodi bele kumpre meta hodi identifika mekanizmu di’ak, nune’e bele implementa lalais dekretu ne’e rasik,” nia akresenta.

Atividade ne’e hetan partisipasaun másimu hosi Reitór, Vise-Reitór no Dekanu Fakuldade sira hosi IESPP 18.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here