Primeiru Ministru, Taur Matan Ruak, prezide reuniaun extradordinária Konsellu Ministru, iha Palásiu Governu, kuarta (24/11). Imajen TATOLI/Francisco Sony

DILI, 24 novembru 2021 (TATOLI)—Ministru Ensinu Superiór, Siénsia no Kultura, (MESSK), Longuinhos dos Santos, aprezenta Projetu Dekretu-Lei iha reuniaun Konsellu Ministru (KM), ne’ebé hetan ona aprovasaun, kona-ba rejime jurídiku kurríkulu padraun nasionál ensinu superiór.

“Aleinde ne’e, dekretu-lei ne’e regula sistema bináriu no rejime jurídiku ba grau no diploma ensinu superiór, ne’ebé ho kondisaun ba ninia atribuisaun, sistema kréditu, kalendáriu letivu, sistema avaliasaun ba unidade kurrikulár no konkluzaun ba programa estudu sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.

Diploma ne’e mai ho objetivu atu regulamenta no dezenvolve diploma no grau sira ne’ebé sistema ensinu bináriu bele oferese ba estudante ensinu superiór no garante sistema transferibilidade ida entre sira ne’e rasik.

Nune’e mós, garante koñesimentu no kompeténsia mínimu ne’ebé presiza hodi hala’o profisaun determinada, hodi define sistema avaliasauan ba ensinu superiór ne’ebé halo estudante sira sai emprendedór no kompetitivu iha merkadu traballu atuál nasionál no internasionál, garante koñesimentu no kompeténsia sékulu 21.

Permite mós alunu no dosente sira ensinu superiór bele utiliza kuadru mobilidade nasionál no internasionál ida iha planu estudu, inklui iha kompeténsia no rekoñesida iha merkadu traballu internasionál.

“Inisiativa ne’e bele fasilita prosesu rekoñesimentu diploma ne’ebé alunu sira hetan iha estabelesimentu ensinu superiór nasionál nível internasionál, nune’e permite rekoñesimentu ba diploma sira ne’ebé hetan iha estranjeiru iha nível nasionál,” Portavóz Governu esplika.

Uniformiza aplikasaun kurríkulu

Iha sorin seluk, Ministru Ensinu Superiór, Siénsia no Kultura, Longuinhos dos Santos, hateten, dekretu-lei ne’ebé aprezenta, atu ajuda aplikasaun kurríkulu hosi instituisaun ensinu superiór públiku no privada sira.

“Nune’e bele uniformiza kurríkulu, sistema kréditu, no sistema avaliasaun, tanba antes ne’e hatuur ona iha artigu 17 no 20 hosi Lei Baze Edukasaun númeru 14/2008 29 outubru,” governante ne’e dehan.

Tuir Ministru, dekretu-lei ne’e sei fó vantajen ba universitáriu sira atu sai empreendedór, atu nune’e bele kompete iha merkadu traballu ne’ebé reál iha nível nasionál no internasionál.

Aleinde ne’e, bele reforsa rejime jurídiku kurríkulu padraun mínimu ne’ebé permite estudante no dosente sientísta inklui peskizadór sira ne’ebé iha planu estudu atu halo mobilidade iha nível rejionál no internasionál ho sistema akumulasaun no Transfere Kréditu Europa.

Sistema akumulasaun no Transfere Kréditu Europa daudaun ne’e Universidade Nasionál Timor Lorosa’e (UNTL) mak estabelese ona, ne’ebé MESSK hamosu dekretu-lei hodi fó vantajen ba institutu ensinu superiór privada sira atu estabelese mós sistema kurríkulu padraun mínimu.

Elaborasaun dekretu-lei ne’e rasik ho kolaborasaun hamutuk ho péritu na’in-hitu hosi universidade públiku no privadu hodi elabora hela matéria kurríkulu ba kada kursu hamutuk ho dosente sira.

Jornalista  : Antónia Gusmão/Tomé Amado

Editora       : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here