Prezidente FFTL, Francisco Jerónimo. Imajen TATOLI/Francisco Sony

DILI, 29 marsu 2022 (TATOLI)— Prezidente Federasaun Futeból Timor-Leste (FFTL), Francisco Martins da Costa Pereira Jerónimo, tersa ne’e, hamutuk ho delegasaun halo sorumutu ho delegasaun hosi Federation International Football Association (FIFA) hodi hato’o progresu futeból iha Timor-Leste.

Iha sorumutuk entre delegasaun FTTL no FIFA ne’ebé realiza iha Doha-Qatar ne’e, Lideransa FFTL hetan kongratulasaun hosi FIFA kona-ba progresu futeból iha Timor-Leste ne’ebé hatudu progresu di’ak.

“Ohin, delegasaun FFTL ne’ebé ha’u lidera atende enkontru ho delegasaun FIFA hodi relata progresu servisu liuliu relasiona ho finansa no administrasaun no mós estrutura iha FFTL aprezentasaun kona-ba prioridade iha área infraestrutura hanesan kampu futeból no fatin treinu,” Prezidente FFTL ne’e hateten ba Agência TATOLI via rede sosiál.

Notísia relevante:  Fulan ne’e, Prezidente FFTL partisipa kongresu anuál FIFA iha Qatar

Iha biban ne’e, FIFA kongratula FFTL ba susesu ne’ebé atinje ona iha tempu ne’e liuliu progresu futeból iha Timor-Leste ne’ebé hatudu progresu di’ak tebes no husu atu kontinua serbisu hodi hadi’a di’ak liután iha futuru.

Aleinde ne’e, FFTL mós  hato’o ba FIFA kona-ba infraestrutura  atu hadi’a kampu futeból ne’ebé ho kualidade ba jogadór sira.

“Ita nia prioridade ne’e FIFA konkorda no husu atu kompleta dokumento rai nian antes hahú harii infraestrutura kampu futeból no seluk tan iha Timor- Leste hodi fasilita ita nia jogadór sira iha futuru ho di’ak liután,” Lideransa FFTL ne’e informa.

Tuir ajenda delegasaun FTTL, kuarta (30/03) sei hasoru malu ho parte Asian Football Confederation (AFC) hodi ko’alia kona-ba preokupasaun FFTL iha área formasaun ba atividade futeból feto no juveníl nian.

Enkuantu, iha loron 31 marsu, delegasaun FFTL sei partisipa kongresu annuál FIFA nian ne’ebé hala’o mós iha nasaun Qatar.

Entretantu, Francisco Martins da Costa Pereira Jerónimo hetan fiar hosi asosiasaun nain-11 hodi re-eleitu ba Prezidente Federasaun Futeból Timor-Leste (FFTL) ba períodu 2022-2026.

Liuhosi Kogresu nasionál ba dahitu ne’ebé realiza iha Hotel Novo Turismo, Francisco Jerónimo re-eleitu ba  Prezidente FFTL tanba hetan konfiansa liuhosi vota sekretu hosi assosiasan futeból hamutuk na’in-11 no Nilton Gusmão hetan votu 10. Hosi asosiasaun hamutuk 21.

Ho nune’e Francisco Jerónimo re-elitu ba Prezidente FFTL no Xefe Estadu Maiór FALINTIL-Forsa Defeza Timor-Leste (F-FDTL), Tenente Jeneral Falur Rate Laek mak sai vise prezidente.

Notísia relevante: Kongresu FFTL dahitu, SEJD louva Francisco Jerónimo tanba futeból iha progresu

Jornalista  : Hortencio Sanchez

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here