DILI, 30 marsu 2022 (TATOLI)—Adidu Imigrasaun Embaixada Repúblika Indonézia iha Timor-Leste (KBRI, sigla indonéziu), Eben Rifqy Taufan Sitopu, hateten, Reprezentante Timor-Leste iha Indonézia presiza halo aprosimasaun ho autoridade Indonézia hodi timor-oan sira bele asesu ba Visa on Arrival (VoA) bainhira tama Indonézia.
“Reprezentante Timor-Leste iha Jakarta presiza ativamente halo pedidu hetan Visa on Arrival, hanesan Adidu Imigrasaun, ami hosi Embaixada Repúblika Indonézia iha Timor-Leste fasilita no ajuda,” Adidu Imigrasaun KBRI informaba Agência TATOLI, via telefónika, tersa ne’e.
Nia dehan, daudaun ne’e, KBRI kontinua halo esforsu hodi aprezenta proposta ba Ministériu Negósiu Estranjeiru Indonézia no Ministériu Justisa no Direitu Umanu, espesialmente Sentru Imigrasaun hodi Timor-Leste bele asesu VoA, tanba haree ba nasaun rua ne’e iha istória no relasaun serbisu bilaterál ne’ebé metin.
“Espera Timor-Leste bele tama nasaun asesu Visa on Arrival, nune’e bele livremente hetan viza, Embaixadór Indonézia no ami sei esforsu maka’as hodi Timor-Leste bele tama, tanba ami kompreende kondisaun iha ne’e no ita hanesan familía ida de’it,” Adidu Imigrasaun akresenta.
Notísia relevante: Timor-Leste la hetan VoA iha Bali, KBRI admite hanesan desizaun provizóriu
Prosesu trata viza tama Indonézia, liuhosi pedidu aplikasaun no aprovasaun vistu online ou direitamente ba KBRI Dili, ho tipu viza vizita ho folin $50 no ba Kartu Izin Tinggal Terbatas (KITAS) ho folin $150.
Bainhira timor-oan hakarak tama Indonézia ho objetivu atu serbisu, tenke hetan rekomendasaun hosi Ministériu Traballu hosi Indonézia no ba estudante tenke hetan rekomendasaun hosi Ministériu Edukasaun.
Nia dehan, daudaun ne’e Embaixada Repúblika Indonézia tuir de’it prosedimentu no regulamentu ne’ebé hasai hosi Sentru Imigrasaun iha Indonézia maibé to’o agora Embaixada rasik seidauk fixa folin ba tratamentu viza.
“Karik iha eskola ka universidade ne’ebé ajuda prosesamentu vistu ka patrosinadór (sponsor), iha folin ketak fali maibé folin daudaun bele deside hosi Governu Indonézia. Karik ema ruma ne’ebé selu to’o $300 ne’e dalaruma nia liuhosi ema ruma mak ajuda, ha’u-nia mensajen labele obriga-an hodi tama Indonézia liuhosi dalan ne’ebé la loos tanba bainhira ita tuir dalan laloos mak ita selu ema karun,” Adidu imigrasaun fó hanoin
Governu Indonézia liuhosi Diresaun Jerál Imigrasaun, aumenta ona nasaun ne’ebé ninia sidadaun bele vizita Bali no Illa Riau iha Indonézia, ho falilidade VoA, ba nesesidade turístika, hahú hosi loron 22 Maret 2022.
Ba sidadaun estranjeiru seluk ne’ebé tama Indonézia liuhosi Illa Riau tenke iha rezidente permanente iha Singapura, no ba sidadaun hosi nasaun seluk ne’ebé seidauk tama lista asesu VoA, bele nafatin tama Indonézia ho pedidu vistu online.
Nasaun foun ne’ebé agora tama lista VoA bainhira Vizita Bali hamutuk 42 hanesan Áfrika Súl, Estadu Unidu Amérika, Arábia Saudita, Arjentina, Austrália, Olandés, Béljika, Brazíl, Brunei Darussalam, Dinamarca, Filipina, Finlándia, Hungria, Índia, Grã Bretanha, Itália, no Japaun.
Hanesan mós, Alemaña, Kamboja, Kanadá, Koreia Súl, Laos, Malázia, México, Myanmar, Noruega, França, Polónia, Catarense, Nova Zelándia, Seychelles, Singapura, Español, Suécia, Suíça, Taiwan, Tailándia, Xina, Tunes, Peru, Emiradu Árabe Unidu no Vietname.
Aleinde ne’e, iha nasaun foun 25 ne’ebé bele asesu VoA bainhira tama Illa Riau, ho kondisaun sidadaun ne’e iha rezidente permanente Singapura, mak hanesan Estadu Unidu Amérika, Arábe Saudita, Austrália, Olandés, Brunei Darussalam, Filipina.
Nune’e mós, Índia, Grã Bretanha, Itália, Japaun, Alemaña, Kamboja, Kanadá, Korea Súl, Laos, Malázia, Méxiko, Mianmar, França, Singapura, Español, Taiwan, Tailándia, Xina no Vietname.
Governu Indonézia mós oforese fasililidade livre viza ba nasaun sia hodi vizita illa Riau, maibé tenke iha rezidente permanente iha Singapura, mak hanesan Brunei Darussalam, Filipina, Kamboja, Laos, Malázia, Myanmar, Singapura, Tailándia no Vietname.
Jornalista : Arminda Fonseca
Editora : Julia Chatarina
