Adidu Imigrasaun Embaixada Repúblika Indonésia (KBRI, sigla indonézia) iha Timor-Leste, Eben Rifqy Taufan. Imajen TATOLI/Cidália Fátima

DILI, 07 marsu 2022 (TATOLI)—Governu Indonézia liuhosi Diresaun Jerál Imigrasaun hosi Minitériu Justisa no Direitu Umanu Indonézia, publika ona regra hodi loke Visa on Arrival (VoA) ba turista hosi nasaun hamutuk 23, ne’ebé la inklui Timor-Leste maski hanesan nasaun viziñu.

Regra ne’e hahú vigora iha segunda (07/03) no aplika ba turista estranjeiru ne’ebé sei visita Bali, Indonézia.

Nasaun 23 ne’ebé ninia sidadaun bele tama Bali uza VoA mak hanesan Austrália, Estadu Unida Amérika (EUA) Olanda, Brunei Darussalam, Filipina, Inglaterra, Itália, Japaun, Alemaña, Cambodia, no Canadá, Koreia Súl, Laos, Malázia, Myanmar, Fransa, Qatar, Nova Zelándia, Singapura, Tailándia, Turquia, Emiradu Árabe Unidu no Vietname.

Dezisaun ne’e hanesan rezultadu reuniaun koordenasaun ne’ebé realiza hosi Imigrasaun Sentrál Indonézia, ne’ebé inisia hosi Governadór Bali, Wayan Koster, no partisipa hosi ministériu sira ne’ebé iha relasaun ho investimentu, turizmu, relasaun externu, justisa no direitu umanu.

Tuir Adidu Imigrasaun Embaixada Repúblika Indonésia (KBRI, sigla indonézia) iha Timor-Leste, Eben Rifqy Taufan, desizaun ne’e provizóriu.

“Implementasaun polítika aplika kuarentena no servisu VoA ba vizitante sira ka Pelaku Perjalanan Luar Negeri (PPLN) hanesan dezisaun provizóriu de’it no bele iha mudansan hafoin avaliasaun adisionál. Agora implementa ona no vizita agora ba de’it turista, sei la fasilita sira ne’ebé ba serbisu no negósiu, inklui atividade sira seluk. Tanba sá Timor-Leste la tama? Tanba ne’e hanesan percobaan de’it hafoin sei iha avaliasaun. Ita espera ba oin la’ós de’it vizita turizmu maibé bele ba seluk mós hanesan negósiu,” Adidu Imigrasaun KBRI esplika ba Agência TATOLI, iha edifísiu Farol, segunda ne’e.

Notísia relevante: MNEK husu embaixadór iha Indonézia rekolla dadus estudante Timor-oan vistu expira

Maski nune’e, Eben Rifqy Taufan, hateten, KBRI sei esforsu hodi propoin ba Governu Indonézia nune’e Timor-Leste bele tama mós iha lista ne’ebé bele simu VoA.

Tuir dadus husi Badan Pusat Statistik (BPS) Indonézia, totál vizitante turista iha Indonézia barak mak hosi Timor-Leste iha tinan 2019 ho totál 1.178.381, enkuantu tinan 2020 ho vizitante 994.590.

Nune’e mós, dadus hosi Ministériu Turizmu no Ekonomia Indonézia, turista ne’ebé vizita Indonézia iha fulan-dezembru barak liu hosi Timor-Leste hamutuk 84.975 no tuir fali mak Malázia, Papua Nova Guiné, China no Rússia.

Daudaun ne’e, prosesu tama no sai bele liuhosi fronteira Batugade, maibé tenki tuir protokolu saúde no kumpre kuarentena durante loron-tolu, fronteira Indonézia loke loron-loron, no parte Timor-Leste nian iha loron segunda no kuarta.

Iha sorin seluk, Emprezáriu timor-oan, Pedro Miguel Carrascalão, husu ba Governu Timor-Leste atubele aprosima Governu Indonézia,  nune’e pasaporte Timor-Leste bele hetan VoA iha Bali.

“Ami bele mós halo pedidu ba Governu Timor-Leste hodi bele halo mós flight loron-loron ka semana ida dala-ida no aumenta tuir nesesidade. Tanba Bali hahú loke no la presiza kuarentena ona, maibé Visa on Arrival ba sidadaun Timor-Leste no Portugal mak seidauk bele no vasina tenki kompletu inklui booster. No mós regra seluk hanesan pagamentu ba hela fatin tenki lunas molok to’o iha Bali no asuransi ne’ebé kobre COVID-19,” haktuir Pedro Carrascalão liuhosi ninia pájina.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here