Membru PNTL sira hala'o marka pasu, iha ámbitu selebrasaun aniversáriu PNTL ba da-XXII, Iha Sentru Formasaun PNTL, Comoro, domingu (27/03). Imajen TATOLI/Francisco Sony

DILI, 27 marsu 2022 (TATOLI)—Komandante Jerál Polísia Nasionál Timor-Leste (PNTL), Komisáriu Faustino da Costa, husu ba membru hotu atu sai forte hodi garante seguransa ba povu no nasaun.

“Ha’u nia membru PNTL hotu mak ha’u hadomi, imi tenke sai anglu ne’ebé forte no metin atu fó seguransa ba povu no nasaun,” Komisáriu hateten, iha selebrasaun aniversáriu PNTL ba da-XXII, iha Sentru Formasaun Polísia Comoro, domingu ne’e.

Notísia relevante: Aniversáriu ba da-XXII, PR enkoraja PNTL hasa’e prezensa iha komunidade lokál

Komandante Jerál PNTL, Komisáriu Faustino da Costa. Imajen TATOLI/Francisco Sony

Tuir Komandante PNTL, ho promesa hirak ne’e mak bele fó esperansa ba povu tomak, nune’e membru hotu tenke mantein pozisaun sai ida ba povu tomak no ba ema hotu.

“Ita hotu tenke kumpre didi’ak misaun hotu no firme nafatin iha servisu hodi garante pás no estabilidade ba sosiedade. Ha’u konta ho imi hotu, ita hotu ninia servisu hamutuk atu hatudu ba jerasaun sira bele sente Timor-Leste ida seguru no livre, parabéns ba ita hotu,” nia tenik.

Instituisaun PNTL harii iha tinan 2000, ne’ebé mai kedan ho lema ‘serví no proteje povu tuir lei  no orden’, ne’ebé daudaun ne’e iha membru totál 4.089, kompostu hosi mane 3.477 no feto 612.

PNTL iha operasaun ualu, kompostu hosi Unidade Espesiál Polísia, Unidade Patrullamentu Fronteira, Unidade Polísia Marítima, Tránzitu, Servisu Investigasaun Kriminál, Polísia Komunitária, Relasaun Públika no Relasaun Internasionál.

Enkuantu, ba administrasaun, PNTL iha Sentru Formasaun Polísia, Departamentu Justisa, Jéneru, Aprovizionamentu no Rekursu Umanu.

Bazeia ba Konstituisaun artigu 147 kona-ba ‘Polísia ho forsa seguransa’, Polísia tenke defende legalidade demokrátika no garante seguransa interna ba sidadaun hotu no la inklina ba partidu, halo prevensaun krime tenke bazeia ba respeitu direitu umanu no lei maka determina regra no regulamentu  ba Polísia, forsa seguransa no forsa sira seluk.

Jornalista : Hortencio Sanchez

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here