Diretór Jerál MOP, Rui Hernani. Imajen TATOLI/Florêncio Miranda Ximenes

DILI, 23 agostu 2021 (TATOLI)-Governu liuhosi Ministériu Obra Públika (MOP) halo ona avizu ikus ba abitantante afetadu kompensadu hamutuk 140 resin atu hamamuk área konstrusaun estrada protokolu dirasaun Tasi-tolu to’o rotunda Comoro iha semana rua nia laran, hahú hosi loron 17 agostu.

“Ita haree komunidade barak mak aruma ona sira-nia sasán no uma, maibé ami nafatin notifika abitante sira presiza hamamuk uma ou fatin sira ne’ebé hetan ona indemnizasaun,” Diretór Jerál Obra Públika no Koordenadór Jerál Expropriasaun Rotunda – Tasi-tolu, Rui Hernani, hateten ba Agência TATOLI, iha ninia knaar fatin, Mandarin, segunda ne’e.

MOP notifika abitante tanba Banku Dezenvolvimentu Aziátiku (ADB, sigla inglés) ho Governu Timor-Leste halo diskusaun ne’e hodi hetan aprovasaun ba planu atubele hahú konstrusaun estrada protókolu.

“Ita fó hotu indemnizasaun ba komunidade afetadu liuhosi transfere ba konta bankária sira. Maibé falta edifísiu São Miguel Arcanjo tanba orsamentu boot liu millaun $1 ba leten,” nia akresenta.

Nune’e, Ekipa task force hahú halo ona ajustamentu hodi lori relatóriu ba Ministru Obra Públika, Salvador Eugênio Soares dos Reis Pires, atu asina hafoin lori ba Konsellu Administrativu Fundu Infraestrutura (KAFI) atu halo aprovasaun hodi halo pagamentu.

Kustu indemnizasaun ba abitante afetadu sira, hahú hosi setembru 2020 to’o ramata iha janeiru 2021 ho montante millaun $1,6 resin.

Nia dehan, abitante sira ne’ebé la husik fatin mamuk, servisu ekipamentu pezadu hosi MOP sei halo demolisaun ka sobu uma ou fatin afetadu sira iha tempu badak.

“Ita identifika fatin afetadu no molok atu halo pagamentu, ita halo konsultasaun no aprezenta ona valór ba abitante no sira aseita hotu ona no ikus liu Estadu halo transferénsia ona osan, tanba ne’e laiha razaun atu ema la husik mamuk,” nia hatutan.

Estrada Tasi-tolu to’o Rotunda Comoro ne’e kuaze kilómetru rua hamutuk ho pakote estrada trosu Tibár to’o Tasi-Tolu, ne’ebé toma konta hosi kompañia internasionál China Wuyi, ho kustu millaun $12 resin, ho durasaun serbisu hahú iha loron 28 fevereiru 2017 to’o outubru 2019.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here