VIQUEQUE, 27 marsu 2022 (TATOLI)–Ministériu Interiór (MI) liuhosi Diresaun Nasionál Prevensaun Konflitu Komunitáriu (DNPKK) hamutuk ho Organizasun Naun Governamentál (ONG) Belun, segunda ne’e, kapasita autoridade lokál no Ofisiál Polisiamentu Suku (OPS) kona-ba medida prevensaun konflitu iha munisípiu Viqueque.
“Ita presiza hasa’e sira-nia koñesimentu hodi halo prevensaun konflitu sira ne’ebé akontese iha suku, atu sira bele atende ho di’ak,” Diretór Prevensaun Konflitu Komunitáriu, António Viegas, hateten ba Agênsia TATOLI, iha salaun administrasaun munisipál, segunda ne’e.
Notísia relevante: GAM tolu asina akta kompromisu asaun dame iha Viqueque
Tuir Diretór ne’e, maski durante ne’e sira hetan ona formasaun oin-oin, maibé ho inisiativa ekipa nafatin fó kapasitasaun hodi sai bukae ida, nune’e benefisiáriu sira bele aplika iha terreinu bainhira hasoru problema ruma.
“Kapasita sira rezolve komflitu, nune’e iha kapasidade profisionál hasoru komunidade. Tanba liuhosi atendimentu di’ak maka komunidade foin satisfaz ba problema sira ne’ebé mosu. Tanba ne’e maka Governu liuhosi Ministériu Interiór ho hanoin ida katak presiza fó kapasitasaun autoridade lokál tanba sira maka loron-loron hasoru problema iha baze no presiza serbisu hamutuk hodi rezolve konflitu sira,” nia akresenta.
Atividade ne’e ho tópiku tolu hanesan elementu harii pás liga ho direitu umanu, prevensaun konflitu no solusaun konflitu.
Atividade ne’e realiza durante loron ida, ne’ebé partisipa hosi xefe suku, juventude suku no OPS iha postu Viqueque villa.
Jornalista : Vitorino Lopes da Costa
Editora : Julia Chatarina
