DILI, 15 fevereiru 2022 (TATOLI)-–Grupu Arte Marsiál (GAM) tolu hanesan Ikatan Kera Sakti (IKS), Persaudaraan Setia Hati Terate (PSHT) no Kmanek Oan Rai Klaran (KORKA), tersa ne’e, halo enkontru no asina akta kompromisu ba asaun dame iha munisípiu Viqueque.
Inisiativa ne’e organiza hosi Komisaun Reguladór Arte Marsiál (KRAM) ho objetivu atu hametin lasu amizade entre organizasaun Arte Marsiál sira iha rejiaun.
“Asaun dame ne’e hodi labele hamosu tan konflitu iha Viqueque, atu hametin unidade entre organizasaun arte marsiál sira hodi mantein seguransa, pás no estabilidade iha ita-nia rai-laran,” Prezidente KRAM, Octávio da Conceição, hateten, ba Agência TATOLI, via telefónika, tersa ne’e.
Notísia relevante: KRAM kontinua komunika líder arte-marsiál tolu hodi submete planu atividade
Aleinde ne’e, KRAM halo mós diálogu ho líder GAM sira, atu hametin lasu amizade entre organizasaun Arte Marsiál sira ne’ebé indika iha rezolusaun númeru 4/2020, ne’ebé relasiona ho situasaun sira ne’ebé akontese ikus mai, atu haree GAM sira bele lolo liman no halibur malu hanesan ema Viqueque-oan.
“Ha’u husu ba líder GAM sira atu labele hakiduk ba kotuk, maibé tenki brani hamriik metin hodi hala’o ba oin. Kuandu iha problema líder labele tuur iha uma, líder mak ba ko’alia uluk ho parte autoridade seguransa, tanba iha artigu 28 lei númeru 5/2017, kona-ba kolaborasaun, sé mak halo kolaborasaun dahuluk ho autoridade Estadu maka líder sira, labele membru sira mak halo problema, líder sira subar iha uma maka ko’alia de’it telefone, ne’e la’ós treinadór ka líder profisionál ne’ebé hamriik metin hodi la’o ba oin ho responsável iha organizasaun,” nia apela.
Tuir Prezidente GAM, iha nasaun Timor-Leste, seguransa Estadu mak FALINTIL-Forsa Defeza Timor-Leste (F-FDTL) no Polísia Nasionál Timor Leste (PNTL), nune’e grupu ka organizasaun sira labele organiza malu hamutuk hodi minimiza forsa Estadu, ho nune’e hakerek ona iha Konstituisaun artigu 49 ne’ebé hateten sidadaun hotu iha dever no obrigasaun atu kontribui ba pás no estabilidade iha nasaun.
Orienta atu lolo liman ba malu
Nune’e mós, Prezidente sub-KRAM munisípiu Viqueque, Cosme Sarmento, haktuir, hosi diálogu ne’e hetan orientasaun hosi nasionál hodi Halibur Organizasaun Arte Marsiál hotu atu lolo liman ba malu hodi simu malu hanesan ema Viqueque-oan.
“Ohin diálogu ne’e, GAM sira fó sira-nia kompromisu katak nu’udar Viqueque-oan ne’ebé hanesan organizasaun Arte Marsiál no Rituál, bele diferente organizasaun maibé sira bele lolo liman ba malu hodi kria pás no estabilidade iha munisípiu Viqueque,” nia haktuir.
Biban ne’e, nia husu ba GAM hotu tenki fó liman ba malu hamutuk hodi kontribui ba seguransa no pás iha rejiaun ne’e.
Iha diálogu no asaun dame ne’e, hetan partisipasaun hosi Komandante PNTL munisípiu Viqueque, autoridade lokál inklui líder GAM hanesan IKS, PSHT, no KORKA iha munisípiu Viqueque.
Jornalista : Vitorino Lopes da Costa
Editora : Julia Chatarina
