DILI, 27 marsu 2022 (TATOLI)—Partidu tolu kompostu hosi Partidu Libertasaun Populár (PLP), Frente Revolusionária do Timor-Leste Independente (FRETILIN), Kmanek Haburas Unidade Timor Oan (KHUNTO) prontu apoiu Prezidente Repúblika (PR) períodu 2022-20227, Francisco Guterres ‘Lú Olo’ hakat ba Eleisaun Prezidensiál 2022 segunda volta.
“Seguru ona katak PLP, KHUNTO hamutuk ho FRETILIN apoiu Lú Olo, ami sei habelar tan plataforma ida-ne’e ba organizasaun hotu ne’ebé atu apoiu Lú Olo sai kandidatura nasionál ida,” Sekretáriu Jerál FRETILIN, Marí Alkatiri, hateten ba jornalista sira iha ámbitu konferénsia nasional PLP, iha salaun Canossa, Has-laran Manleuana, domingu ne’e.
Notísia relevante: Lú Olo fiar metin manán iha primeira volta
Iha fatin hanesan, Prezidente PLP, Taur Matan Ruak, deklara, sei hamutuk ho FRETILIN lori Lú Olo manán iha eleisaun segunda volta.
“Militante hotu mantein iha ita-nia pozisaun, tenke asegura ita-nia ukun to’o tinan 2023 no fó vitória ba Lú Olo,” Taur dehan.
Nune’e mós, Konselleru Másimu Partidu KHUNTO, José dos Santos Naimori, reforsa, partidu tolu ne’e sei hamrik hamutuk.
“Ami partidu tolu soe malu ladi’ak, ami hamutuk lori Maun Lú Olo sai Prezidente dala-ida tan,” Naimori deklara.
Bazeia hosi dadus Sekretariadu Tékniku Administrasaun Estatál (STAE) no Komisaun Nasionál Eleisaun (CNE, sigla portugés) Kandidatu PR, José Ramos Horta ho votu 301.481 (46,58%), enkuantu Kandidatu PR, Francisco Guterres ‘Lú Olo’ ho votu 143.408 (22,16%), hosi totál votu válidu hamutuk 647.172 iha territóriu tomak, ne’ebé posibilidade kandidatura rua kompete iha eleisaun segunda volta.
VIII Governu Konstituisionál daudaun ne’e forma hosi PLP, KHUNTO no FRETILIN, iha programa ne’ebé nu’udar instrumentu polítiku ba tinan lima, ne’ebé reflete aspirasaun povu timor-oan no fó sai medida prioritária sira ba dezenvolvimentu sustentável, hanesan define ona iha ‘Planu Estratégiku Dezenvolvimentu 2011-2030’.
Iha loron 21 marsu 2020, Sekretariu Jerál FRETILIN, Marí Alkatiri no Prezidente PLP atuál Primeiru-Ministru VIII Governu Konstitusionál, Taur Matan Ruak, asina plataforma entendimentu entre partidu rua hodi mantein Taur hanesan Xefe Governu to’o termina mandatu iha tinan 2023 no la konkorda Eleisaun Antesipada.
Nune’e Prezidente Repúblika, Francisco Guterres ‘Lú Olo’ promulga Orsamentu Jerál Esttadu (OJE) 2020 iha loron 19 outubru 2020.
Jornalista : Hortencio Sanchez
Editora : Julia Chatarina
