Kandidatu Prezidente Repúblika ho númeru sorteiu 06, Francisco Guterres 'Lú Olo'. Imajen/Mídia PR.

DILI, 19 marsu 2022 (TATOLI)–Kandidatu Prezidente Repúblika (PR) hosi partidu Frente Revolucionária do Timor-Leste Independente (FRETILIN) ba períodu 2022-2027, ho númeru sorteiu 06, Francisco Guterres ‘Lú Olo’, ezerse ona votu nu’udar sidadaun iha Eleisaun Prezidensiál, iha estasaun 01 sentru votasaun Farol, suku Motael, postu administrativu Vera Cruz, iha tuku 08:10 dadeer. 

Atuál Prezidente Repúblika ne’e ezerse votu akompañadu hosi Espoza, Cidália Nobre Guterres, utiliza karreta privadu ho númeru matríkula A 26.689, no seguransa hosi seguransa pesoál sira no uza transporte seguransa nian (karreta Estadu).

Hafoin vota, Kandidatu PR ne’e fiar-an hodi deklara katak sei pasa ba segunda volta.

“Ha’u fiar metin katak ha’u manán iha ronde dahuluk, husik ba povu ninia votu mak sei konfirma,” Lú Olo otimista.

Notísia relevante: Kampaña ikus, Lú Olo kompromete sai Prezidente Repúblika ba povu

Maski nune’e, nia dehan, sé de’it mak kompete tenke prontu lakon no manán.

“Ha’u dehan katak sei manán, maibé bainhira lakon prontu servisu hamutuk tanba mesak timor-oan, tanba kampaña hotu ona, agora vota no hein sura de’it votu sira, kuandu hotu ona ida de’it mak sai Prezidente Repúblika no ita hotu nia Prezidente,” Lú Olo afirma.

Biban ne’e nia reafirma fali katak, bainhira povu fó fiar ba nia hodi reeleitu, komprometidu sai Xefe Estadu ne’ebé hametin Estadu direitu demokrátiku, hodi hadi’a no halo dezenvolvimentu sustentável ba  povu nia moris di’ak.

Biban ne’e, Kandidatu PR enkoraja ekipa responsável ba eleisaun hodi serbisu ho di’ak no responsabilidade.

“Ligadu ho kontajen votu, ha’u haree ekipa sira presiza hala’o serbisu ho di’ak, atu nune’e bele halo apuramentu loloos ba rezultadu,” nia dehan.

Sentru votasaun Farol Loke iha tuku 07:00 dadeer, ne’ebé fó prioridade uluk ba Fiskál, Brigadista, Polísia Nasionál Timor-Leste (PNTL), no mídia.

Totál eleitór iha suku Motael hamutuk 4.939, fahe ba sentru votasaun haat hanesan Eskola Ensinu Báziku Filiál (EBF) nú.01 Farol, sentru juventude Bebora, Gudang Bebora, no sede suku Motael.

Jornalista : Antónia Gusmão

Editora    : Julia Chatarina 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here