Estudante Ekola CAFE simu vasina Pfizer, iha Eskola CAFE, Beloi, sesta (25/03). Imajen TATOLI/Vitorino Lopes da Costa

VIQUEQUE, 25 marsu 2022 (TATOLI)–Estudante ensinu báziku no sekundáriu hamutuk na’in-107 hosi Eskola Centros de Aprendizagem e Formação Escolar (CAFE) iha munisípiu Viqueque, sesta ne’e, simu ona vasina Pfizer hodi hasa’e imunidade kontra  moras COVID-19.

“Ami kolabora hamutuk ho parte saúde munisípiu Viqueque, mobiliza ekipamentu no pesoál saúde hodi fó vasina ba ami-nia estudante sira, tanba vasina ne’e importante tebes hodi hasa’e imunidade estudante sira-nian,” Ajuntu Eskola CAFE Viqueque, José de Carvalho, hateten Agência TATOLI, iha resintu eskola, Beloi, sesta ne’e.

Notísia relevante:  Ekipa saúde Viqueque halo advokasia vasina Pfizer ba eskola sira

Molok implementa programa imunizasaun ne’e iha eskola ba estudante ho idade 12 to’o 17, profesór sira halo advokasia vasina ba estudante sira-nia inan-aman sira.

“Bainhira estudante sira simu vasina, inan-aman tenki asina karta koñesimentu no aseitasaun hosi Ministériu Saúde (MS). Bainhira aseita ona mak foin fó vasina ba estudante sira, tanba la’ós obrigasaun maibé ho konsiénsia,”  nia tenik.

Tuir Adjuntu, parte eskola la obriga estudante simu vasin, maibé hanesan devér morál ba estudante  sira hodi simu vasina, maski estudante sira tauk simu maibé importante atu kuidadu saúde.

Tuir dadus hosi Ministériu Edukasaun Juventude no Deportu (MEJD), iha estudante purvolta 393.668 hosi nível pre-eskolár, ensinu báziku, ensinu sekundáriu jerál no tékniku vokasionál iha territóriu tomak, ne’ebé hosi dadus ne’e, estudante ho idade 18 ba leten purvolta 50.000-resin.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here