Vasina Pfizer. Imajen TATOLI/António Dasiparu

VIQUEQUE, 21 marsu 2022 (TATOLI)-Diretór Servisu Saúde munisípiu Viqueque, Francisco de Carvalho, informa, ekipa saúde halo ona advokasia vasina Pfizer ba eskola sira hodi estudante bele partisipa iha kampaña imunizasaun kombate COVID-19.

“Ita agora halo advokasia kona-ba vasina Pfizer ba nível munisípiu no postu hotu. Ami agora halo fali advokasia ba eskola sira iha munisípiu ne’ebé daudaun sei la’o hela, hafoin ita foti hotu dadus hosi labarik sira ne’ebé atu simu vasina hodi ita fó vasina,” Diretór Servisu Saúde Viqueque hateten ba Agência TATOLI, iha ninia knaar fatin, Boro-matan, segunda ne’e.

Notísia relevante: MEJD planeia lansa vasina Pfizer ba estudante iha munisípiu tolu

Tuir nia, labarik hosi idade 12 to’o 17 iha territóriu tomak atu hetan vasina Pfizer hodi salva no aumenta imunidade kombate COVID-19 no Omicron variante foun.

“Advokasia ne’e ami sei finaliza iha semana ida-ne’e no sesta agora ami sei halo micro plan ho xefe sentru saúde sira hosi postu lima atu lori dadus estudante nune’e ita bele halo estimasaun ba vasina,” nia akresenta.

Bainhira dadus estudante hosi idade 12-17 tama hotu mak sei forma ekipa saúde hodi fó vasina ba kada eskola.

Iha loron 27 outubru 2021, Ministériu Saúde hamutuk ho Servisu Saúde munisípiu Dili hahú introdús vasinasaun tipu Pfizer ba estudante ho idade 12 to’o 17 iha eskola neen iha Dili.

Molok fó vasina ba estudante, inan-aman sei asina karta aseitasaun hodi fó autorizasaun ba oan sira simu vasina, tanba vasina ne’e laós obrigatóriu.

Tuir dadus ne’ebé Mnistériu Edukasaun Juventude no Desportu (MEJD) rekolla iha territóriu nasionál, iha estudante purvolta 393.668 hosi nível pre-eskolár, ensinu báziku, ensinu sekundáriu jerál no tékniku vokasionál, ne’ebé hosi dadus ne’e, estudante ho idade 18 ba leten purvolta 50.000-resin.

Jornalista : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here