Primeiru-Ministru (PM) Taur Matan Ruak. Imajen Tatoli/Francisco Sony

DILI, 24 marsu 2022 (TATOLI)—Primeiru-Ministru (PM), Taur Matan Ruak, sei fó sai lista remodelasaun daruak ba membru VIII Governu konstituisionál ne’ebé iha tempu oin mai públiku bele hatene.

Notísia Relevante: Aban, PR Lú Olo fó pose ba membru Governu na’in-haat

“Sei iha maibé to’o tempu ami sei fó hatene ba ita-boot sira (jornalista),” Xefe Governu hateten ba ba jornalista sira hafoin ramata enkontru semanál ho Xefe Estadu, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.

PM seidauk fó sai mós prosesu no membru Governu sé-sé no tanbasá mak substitui no hosi partidu ne’ebé tama iha lista remodelasaun, nune’e hein de’it iha tempu tuir mai.

Kona-ba PM hala’o de’it remodelasaun ba membru Governu hosi PLP no la brani halo ba partidu seluk, Xefe Governu ne’e hatán, brani ka la barni desizaun iha Primeiru-Ministru nia liman.

“Ha’u la brani karik la ba funu ida, nune’e ida-ne’e sira-nia opiniaun. Agora, desizaun ne’e orsida Primeiru-Ministru hatene muda sé no tanbasá muda,” nia hateten.

Iha loron 22 marsu ne’e, Prezidente Repúblika, Francisco Guterres Lú Olo, fó pose ba membru VIII Governu Konstituisionál na’in-haat hanesan Ministru Obra Públika (MOP) Abel Pires da Silva, Ministru Justisa (MJ) Tiago Amaral Sarmento, Vise Ministru Finansa António Freitas, Sekretáriu Estadu ba Assuntu Kombatente Libertasaun Nasionál (SEAKLN) Júlio da Conceição ‘Loro Messak’.

Enkuantu, PR liuhusi dekretu Prezidente Repúblika nomea membru VIII Governu na’in-haat uza nia kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta hosi Primeiru Ministru, tuir artigu 86 alinea h) Konstituisaun Repúblika Demokrátika Timor-Leste hateten katak Prezidente Repúblika mak iha kompeténsia atu nomea, fó pose no ezonera membru Governu, tuir proposta husi Primeiru-Ministru.

Molok halo nomeasaun ba membru Governu na’in-haat, tuir proposta hosi Primeiru-Ministru, Prezidente Repúblika liuhosi Dekretu Prezidente Repúblika ezonera Ministru MOP Salvador Eugénio Soares dos Reis Pires, Ministru Justisa Manuel Cárceres da Costa, Vise Ministra Finansa Sara Lobo Brites no Sekretáriu Estadu ba Assuntu Kombatente Libertasaun Nasionál, Gil da Costa Monteiro ‘Oan Soru’.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here