DILI, 21 marsu 2022 (TATOLI)—Prezidente Repúblika, Francisco Guterres Lú Olo, liuhosi Dekretu Prezidente Repúblika sei fó pose ba membru VIII Governu Konstitusionál na’in-haat (4).
Notísia Relevante: Tiago Sarmento troka Manuel Cárceres lidera Ministériu Justisa
“Aban, tersa (22/03), Prezidente Repúblika, Franciso Guterres Lú Olo, sei fó pose ba membru Governu na’in-haat (4), tuku 09.30, iha Palásiu Prezidensiál Nicolau Lobato,” refere komunikadu imprensa ne’ebé Agência Tatoli asesu, segunda ne’e.
Membru Governu na’in-haat (4) ne’ebé hetan nomeasaun hosi Prezidente Repúblika mak hanesan tuir mai ne’e: Ministru Obra Públika Abel Pires da Silva, Ministru Justisa Tiago Amaral Sarmento, Vise-Ministru Finansas António Freitas no Sekretáriu Estadu ba Assuntu Kombatente Libertasaun Nasionál Júlio da Conceição ‘Loro Messak’.
Molok halo nomeasaun ba membru Governu na’in-haat, tuir proposta husi Primeiru Ministru, Prezidente Repúblika liuhusi Dekretu Prezidente Repúblika ezonera: Ministru Obra Púbilka Salvador Eugénio Soares dos Reis Pires, Ministru Justisa Manuel Cárceres da Costa, Vise-Ministra Finansas Sara Lobo Brites no Sekretáriu Estadu ba Assuntu Kombatente Libertasaun Nasionál Gil da Costa Monteiro ‘Oan Soru’.
Prezidente Repúblika uza ninia kompeténsia konstitusionál tuir artigu 106 númeru 2 halo nomeasaun ba membru Governu bazea ba proposta hosi Primeiru Ministru,
Tuir artigu 86 alinea h) Konstituisaun Repúblika Demokrátika Timor-Leste hateten katak Prezidente Repúblika mak iha kompeténsia atu nomea, fó pose no ezonera membru Governu, tuir proposta husi Primeiru Ministru.
Notísia Relevante: Membru Governu na’in-haat tama iha lista remodelasaun
Jornalista : Nelson de Sousa
Editór : Cancio Ximenes
