Adjuntu Komisariu CAC ba Asuntu Prevensaun no Sensibilizasaun, Luis de Oliveira Sampaio. Imajen Tatoli/Egas Cristovão

DILI, 24 marsu 2022 (TATOLI)— Adjuntu Komisáriu Komisaun Anti Korrupsaun (CAC, sigla portuges), ba Asuntu Prevensaun no Sensibilizasaun, Luis Oliveira Sampaio, informa ekipa konjuta identifika motór Estadu hamutuk 27 no karreta lima mak funsionáriu públiku sira uza ba partisipa kampaña eleitorál hosi kandidatu Prezidente Repúblika (PR) períodu 2022 too 2027 ne’ebé hahú iha loron 2 too 16 marsu.

“Hahú iha loron 4 marsu, ami konsege indetifika motorizada Estadu 27, kompostu hosi motór 24 indetifika iha munisípiu sira no tolu iha munisípiu Dili. Karreta Estadu lima maka funsionáriu sira mak uza ba tuir atividade kampaña eleitorál. Nune’e ami halo ona koordenasaun ho Diresaun Jerál Patrimónia Estadu atu identifika motór no karreta ne’e funsionáriu ne’ebé mak uza atu prosesa,” Komisáriu CAC hateten ba jornalista sira iha nia knaar fatin-Matadoro, kinta ne’e.

Motorizada Estadu tolu ne’ebé CAC ideNtifika iha Dili ne’e, funsionáriu balun uza ba partisipa kampaña eleitorál hosi kandidatu PR, José Ramos Horta no Francisco Guterres Lú-olo.

“Funsionáriu ne’ebé uza motorizada ne’e ami lori kedan mai iha edifisiu CAC hodi halo notifikasaun ba sira. Ha’u seidauk hatene sira nain-rua ne’e hosi ministériu ne’ebé, tanba ekipa konjuta seidauk fó fali informa detallu,” Adjuntu CAC ne’e akresenta.

Tanba, atividade kampaña eleitorál hanesan parte ida hosi prosesu demokratizasaun, nune’e apoiante no militante sira hakarak ba partisipa tenke uza viatura privadu, la’ós uza veíkulu Estadu nian.

Nia dehan, tanba bainhira uza viatura Estadu ba partisipa kampaña eleitorál krime pekulatu ho uzu tuir artigu 296 iha kódigu penál Timor-Leste.

“Ami submete ona notisia krime ne’ebé ami foti iha terenu ba iha Ministériu Públiku, depende ba sirkustánsia ho desizaun hosi Ministériu Públiku fó ba ami mak loke investigsaun ou Ministériu Públiku maka halo investigasaun direita depende ba Ministériu Públiku nian desizaun,” nia informa.

Tuir artigu 296 kona-ba pekulatu ho uzu  hateten funsionáriu ne’ebé uza ka husik ema-seluk uza ba fim ne’ebé la tama iha nia destinu veíkulu ka koiza movel seluk ho valór signifikativu, ne’ebé tama iha nia liman ka nia bele kaer tanba nia funsaun, atu hetan ba nia ka ba ema-seluk benefísiu ilejítimu ka hamosu prejuizu ba ema ruma, sei hetan pena prizaun too tinan rua, kuandu buat sira ne’e tama iha nia liman ka nia bele kaer tanba nia funsaun.

Notísia relevante: CAC sei kontrolu patrimóniu Estadu durante kampaña Eleisaun Prezidensiál

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here