Komisáriu CAC, Sérgio Hornai. Imajen TATOLI/António Gonçalves

DILI, 21 fevereiru 2022 (TATOLI)—Ekipa Komisaun Antí-Korrupsaun (CAC, sigla portugés) sei halo kontrolu másimu ba patrimóniu Estadu durante kampaña Eleisaun Prezidensiál, ne’ebé tuir planu sei hahú iha loron 02 marsu 2022, durante semana rua.

Komisáriu CAC, Sérgio Hornai, afirma, patrimóniu Estadu proibidu uza ba atividade partikulár, nune’e mós ba funsionáriu públiku sira, proibidu partisipa iha loron komísiu polítiku sira durante oras serbisu.

“Laiha razaun abuza ka uza sasán Estadu ba iha interese privadu ka partikulár, tanba lei bandu labele uza sasán Estadu ba interese partidária,” Komisáriu CAC hateten iha salaun Komisaun Nasionál Eleisaun (CNE, sigla portugés), segunda ne’e.

Notísia relevante: CAC no PNTL prende veíkulu Estadu lima iha loron feriadu

Komisaun Nasionál Eleisaun (CNE, sigla portugés), orgaun Polísia hanesan Polísia Nasionál Investigasaun Kriminál no Polísia kliminál espesializada sira sei ezerse funsaun halo kontrolu ba sira ne’ebé kontra lei durante kampaña la’o.

“Polísia kriminál iha kompeténsia haree ba krime hanesan pekulatu uzu, tanba ne’e labele uza patrimóniu sira ne’ebé iha ba interese privada ka partidária pesoál,” nia fó hanoin

Nune’e, durante kampaña, orgaun Polísia kriminál Estadu sei halo servisu másimu atubele haree no halo akompañamentu katak prosesu eleisaun ne’e bele la’o ho regra.

“Karik balun kontra regra, sei fó sansaun administrativa no kriminál, maibé depende ba grau, bazeia ba investigasaun ba infratór ka ema ne’ebé sai hanesan responsável nia envolvimentu ba kazu ruma to’o iha ne’ebé,” Komisáriu esplika.

Tanba liuhosi prosesu investigasaun mak bele hatene loloos bainhira suspeitu deskonfia partisipa iha aktu krime.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here