Kontajen votu iha sentru votasaun Eskola Númeru 5 Comoro, sábadu (19/03). Imajen Tatoli/Francisco Sony.

DILI, 23 marsu 2022 (TATOLI)– Tribunál Distrital Dili (TDD), kuarta ne’e, liuhosi juís singular aplika pena Termu Identidadej Rezidénsia (TIR) ba arguidu na’in-21 ne’ebé envolve kazu atake sentru votasaun durante kontajen votu iha Eskola Bázika Fomentu II, iha Sábadu (19/03).

Desizaun ne’e Tribunál foti liuhosi julgamentu primeiru interrogatóriu ba arguidu na’in-21, kompostu hosi inisiál DP, JA, DDS, JC, JD, F, FQ, JL JV, JG, FDC, TAS, AM, J, JC, AJT, CD, AC, AN, AC JL.

Notísia relevante:  PNTL detein suspeitu na’in-21 ba kazu atake sentru votasaun iha Fomentu II

TDD aplika TIR ba arguidu nain 21 ne’ebé halo atake ba sentru votasaun iha eskola primaria Fomentu II/ foto Tatoli Natalino Costa.

Razaun TIR ba arguidu hirak ne’e tanba faktu aprovadu duni katak arguidu sira komete aktu perturbasaun iha sentru votasaun refere.

Tuir akuzasaun hosi Ministériu Públiku katak arguidu na’in-21 ne’e hosi ekipa kandidatu Prezidente Repúblika, ho númeru sorteiu 8, Lere Anan Timur, ne’ebé halo atake ba sentru votasaun iha Fomentu II, iha tuku 3:30, madrugrada.

Iha atake ne’e vidru eskola balun rahun no ema na’in-rua kanek tanba tenta hakalma situasaun iha sentru votasaun, nune’e Komandu munisípiu haruka kedan Forsa Reserva (Taskforce) no Unidade Espesiál Polisia (UEP) no Komandu Eskuadra Dom Aleixo ba no konsege hakalma situasaun no detein kedan suspeitu nai-21.

Nune’e, Komandu PNTL hodi hatama sira iha sela detensaun durante oras 72 hodi halo prosesu ba Ministériu Públiku no submete ba primeiru interrogatóriu iha Tribunál.

Alende ne’e, halo apreensaun ba karreta haat no motorizada lima ne’ebé deskonfia utiliza hosi suspeitu sira halo atus krime, nune’e evidénsia sira ne’e rai ona iha Komandu PNTL Dili atu kontinua investiga.

Haree ba hahalok arguidu sira, Ministériu Publiku kondena arguidu sira ho krime perturbasaun aktu eleitorál ne’ebe previstu iha artigu 235, númeru 2 iha aliña A.

Ho nune’e, Ministeriu Públiku husu ba Tribunál atu aplika pena medida Termu Identidade Rezidénsia (TIR) ho razaun tanba faktu aprovadu duni arguidu sira halo aktu perturbasaun ba atividade votasaun.

Hafoin, Tribunál rona parte hotu deside aplika Termu Identidade Rezidénsia ba agruidu nain-21. 

Audénsia Julgamentu ne’e prezide hosi juis singular, Argentino Nunes, Ministériu Públiku reprezenta hosi Prokuradór Jacinto Barros, Arguidu sira hetan asisténsia legál hosi advogadu privadu Arlindo Sanches, Mariano da Cruz, Ruben Carvalho Ismael Asuncao no Napolião.

Notísia relevante:  PNTL rejista kazu krime eleitorál ualu durante eleisaun prezidensiál

Jornalista: Natalino Costa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here